Jekaria 12

Laro Jerucalem ikare me anyim

1Man lok pa Rwot ikom Icrael: Rwot ma ceng oryeyo polo, dok oketo guti me te lobo, ki ma oketo cwiny dano i i dano, owaco kuman ni, 2“Nen acok miyo Jerucalem doko calo kikopo ma opong ki kongo ma mero rok ducu matye ingete, man miyo gicato macalo lamero kongo. Lukwor birumu taun madito ma i Juda ducu kacel ki Jerucalem bene gibirumu pi lweny ikome. 3Ento inino meno abimiyo Jerucalem bedo got mapek tutwal bot rok ducu; ci jo ducu ma gibitemo tingo gibilimo ret marac. Rok ducu me wi lobo biribe kacel me lweny ikome. 4I ninonu abibango kom aguragura ducu, ki jo ma ringo kwedgi gibidoko lupoya. Ento abiyabo wanga ikom ot pa Juda ikare ma abicoro wang aguragura pa lurok ducu. 5Ka dong kaka me Juda bilok i cwinygi keken gi ni, ‘Jo ma gibedo i Jerucalem gitye ki tek ma oa bot Rwot me mony ma Lubangagi.’

6Inino meno abimiyo kaka me Juda bedo macalo otako ma mac tye kalyel iye i dye yen ma kiduru, nyo macalo mac raa ma lyel ikin reng kal; ci gibiwango rok ducu matye ingetgi murumugi dyereni woko, ento jo me Jerucalem pud bidong ki gwok mera kakare kun jo ma iye gibedo mot ma opye.

7An Rwot aye abikwongo miyo loc i kema pa Juda, wek deyo me ot pa Daudi ki deyo pa jo ma gibedo i Jerucalem pe obed dit makato pa Juda. 8Inino meno abigengo kor jo ma bedo i Jerucalem ki kwot, ci miyo jo magoro ikin gi bibedo tek calo Daudi, ci lakwar Daudi ma a ki ot pa Daudi ma telo wigi bibedo tek macalo lamalaika pa Rwot, dok bedo calo an kikoma aye ma atye katelo nyimgi kikome. 9Dok inino meno abineno ni kijwero rok ducu ma gibino ka lweny ikom Jerucalem. 1012

Abionyo cwiny me kica ki cwiny me bako dog ikom ot pa Daudi ki ikom jo ma bedo i Jerucalem, wek ka gineno ngat ma gicobo, ci gikumu pire, macalo ngat ma kumu pi latine acel keken ma en onywalo, kun kok matek macalo dano ma koko latin kayone ma oto. 11Inino meno kumu bibedo dit tutwal i Jerucalem marom ki kumu pi Adad-rimmon3 i bar me Megiddo. 12Lobo bikumu, kun jo me dogola acel acel kumu pirgi ken gi; jo me ot pa Daudi pat kun nongo mon gi bene kumu pat; jo me ot pa Natan pat kun mon gi bene kumu pat; 13jo me ot pa Levi pat kun mon gi bene kumu pat; jo me dogola pa Cimei pat kun mon gi bene kumu pat. 14Ki jo ducu me dogola mukene ma gudong acel acel bikumu pirgi ken gi, kun mon gi bene gikumu pat.