Jekaria 11

Rwot bituru twero pa luloc ma lugeroni woko

1Yab dogolani, in Lebanon,

wek mac owang yadi cedani woko!

2Kok ba, in ciprec, pien yadi cedar dong kiretogi woko piny,

pien yadi mabecone dong gubale woko!

Wukok ba, wun kworo me Bacan,

pien bunga ma oculeni dong kijwero woko piny!

3Kong dong iwiny koko pa lukwat,

pien deyogi dong peke!

Kong iwiny koko pa labworgu,

pien yadi mukade i dog Jordan dong peke!

Lukwat aryo

4Rwot Lubangana owaco bota ni, “In myero idok lakwat romi ma kipitogi me aneka. 5Jo ma giwilo romi ginekogi dok ngat mo ma miyo ki gin pwod iye bene peke. Jo ma gicato romi giwaco ni, ‘Kipwo Rwot pien dong wadoko lulonyo!’ Wa lukwatgi bene kica pe makogi ikomgi.”

6(Pien kica dong pe bimaka ikom jo ma gibedo i loboni, man lok pa Rwot kikome. Nen, abimiyo ngat acel acel poto i cing lakwate, dong ngat acel acel bipoto i cing rwotgi. Dong gibibalo lobo, giweko dong nono, pe abilaro dano mo ki i cinggi.)

7Kitmeno adoko lakwat pi romi ma kiwilogi me anekani. Akwanyo odoo aryo, ci acako nying acel ni “Kica”, ki mukene acako nyinge “Ribe”, ci acako kwayo romi. 8Yam agiko tic pa lukwat meno adeki woko i dwe acel. Ento man otime pien onongo dong pe atwero diyo cwinya ikomgi, ki gin bene gubedo jo ma igi dong okwera woko. 9Lacen awaco ki romi ni, “An gira pe abibedo lakwatwu. Romi ma myero oto, wek oto; romi ma myero kinekgi, wek kinekgi, ka wek mudonge, ngat acel acel omwod ringo kom lawote.” 10Ka dong akwanyo odoona ma nyinge “Kica”, ci aturu woko, ci aturu kwede gicike ma nene acike kwede ki rok ducu. 11Kitmeno gicikenu kituru woko inino meno; ci lucat romi ma gubedo kanena, gungeyo ni meno obedo lok pa Rwot. 1212 Ka dong awaco botgi ni, “Kace wuneno ni ber, ci wumiya mucarana; ka kono pe, ci wuwek obedi.” Ci gupimo cekel pyere adek me ryal me mucarana. 13Ci Rwot ocika ni, “Bol i ot me kano lim,” en lim ma gin gucula kwede i wel ma gutamoni maber tutwali. Kitmeno atero cekel pyere adeke ci abolo i ot kano lim ma i Ot pa Rwot. 14Lacen ingeye dok aturu odoo me aryone, ma nyinge “Ribe”, kun aturu kwede bene ribe matye ikin Juda ki Icrael.

15Ci Rwot dok ocika ni, “Dok ipor bedo calo lakwat ma konye peke. 16Pien nen, abiyero lakwat mo ki i loboni ma pe biparo pi romi ma gito gitum wokoni, dok bene pe biyenyo romi ma rwenyo, dok pe bicango romi ma olimo ret, kadi wa pito jo ma komgi yot, ento en mere bimwodo ringo romi ma ocwene woko, kun yeco wa ringo ki ikom obong tyen gi.

17Lakwata man ma konye pekeni bineno can,

ma en weko romi mere ata!

Pala lucwan myero otong bade,

dok ocob wange ma lacuc.

Wek bade otal woko matwal, tekone bene otum woko matwal,

ci wange ma lacuc myero bene oto woko libok!”