Jekaria 10

Rwot ocike me laro lwake

1Wugat kot ki bot Rwot i potokot, ka wugat kot ki bote i dye cwir, wek oa ki bot Rwot mamiyo pol mapek, mamiyo kot ma ngido i lobo, ka dok miyo dek twi i poto pa dano ducu. 2Pien cal jogigu1 giloko lok ma konye peke, ki lutyet gineno gin ma bwolo dano, wa jo ma leko lek bene gitito lek me goba, gikweyo cwiny dano nono. Omiyo lwak gilak ata macalo romi; gineno can pien lakwatgi peke.

3Rwot owaco ni, “Kinigana olyeto tutwal ikom luloc ma gin lurok, abiketo can ikom lutela; pien Rwot me mony paro pi romine, ma en aye ot pa Juda. En bilokogi gidoko calo aguragurane ma wake i dog lweny. 4Lutela matego macalo got me twok ot bia ki ikin jo pa Juda, kun gibicung matek liking macalo teke me guru kema, dok bene lulocgi bibedo matego macalo atum me lweny. 5Jo pa Juda ducu bene gibibedo macalo oteka lweny, kun ginyono lukworgi piny i daba ma i dye yoo; gibilweny pien Rwot tye kwedgi, gibimiyo lewic mako jo ma giringo ki aguragura.”

6En owaco ni,

“Abimedo tek bot jo me ot pa Juda, dok abilaro ot pa Yucepu.

Abidwokogi cen pien kica maka ikomgi.

Gibibedo macalo jo mayam pe kong akwerogi,

pien an a Rwot Lubangagi, abigamo lega doggi.

7Jo Icrael bidoko tek macalo twoni oteka lweny,

cwinygi bibedo yom calo cwiny jo ma gitye kamato kongo bwino.

Lutinogi binenone, ci yomo cwinygi,

ci gibibedo ki yomcwiny ikom Rwot.

8Abilwongogi ki lwiyo kun acokogi kacel

ma calo lakwat lwiyo kun lwongo romine,

pien dong atyeko kokogi woko,

dong gibibedo mapol kit mayam con ca.

9Kadi bed onongo akeyogi woko ikin lurok,

ento gibipo pira ki i lobo ducu matye kamabor,

gin kacel ki lutinogi gibibedo kwo,

dok gibidwogo cen.

10Abidwokogi paco ki i lobo Ejipt,

dok abicokogi woko ki i Aciria,

abikelogi wa i lobo me Gilead ki Lebanon,

nio wang ma kabedo biremogi woko.

11Gibiwok ki i atwom madwong

macalo ngat ma wok ki i dye nam,

ento an Rwotgi aye abikweyo tagge me nam,

kut ducu ma i kulu Nail bitwo woko.

Kibijuku wake pa jo Aciria woko,

dok teko pa jo Ejipt bene birwenyo woko.

12Abimiyo jona gibedo matek i Rwot,

ci gibiworo nyinga dok bene gibilubu lok ma mera,

an Rwot kikoma aye aloko man.”