Niyabo 20

Mwaka alip acel

1Ka dok aneno lamalaika mo oa ki i polo kun lor bino piny; onongo omako layab me bur ma tere pe gik, ki nyor mapek adada. 21 Ci omako min kulu madit ca, ma obedo twol macon ni, ma en aye Ladot dok Catan bene, ka otweye woko pi mwaka alip acel. 3Lamalaika meno obole woko ibur ma tere pe gik, oloro dog bur woko, omwono woko bene kun oketo lanen iwiye wek pe dok omede ki bwolo rok ducu, nio wang ma mwaka alip acel dong okato. I nge meno myero kigonye woko pi kare mo manoknok. 42

Lacen dok aneno komker mapol, jo ma gubedo iwigi obedo jo ma onongo kimiyo botgi twero me ngolo kop. Aneno bene tipu pa jo mayam kingolo ngutgi woko pi miyo cadengi ikom Yecu ki pi lok pa Lubanga, gin jo mayam pe guworo lee ca, nyo cale, dok bene ma yam pe guketo lanyute itur nyimgi nyo i cinggi. Gin doki gubedo kwo, gubedo kaloc kacel ki Kricito pi mwaka alip acel. 5Jo ma oto mukenegu ducu pe dok gubedo kwo, nio wang ma mwaka alip acel dong okato. Man aye cer mukwongo. 6Tye ki gum ngat ma bibedo i cer man mukwongoni, dok bene en dano maleng pa Lubanga kikome. Jo macalo meno, to me aryo pe tye ki twero mo ikomgi, ento gin dong gibibedo ajwaki pa Lubanga ki pa Yecu, dok bene gibibedo kaloc kacel kwede pi mwaka alip acel.

7Ka mwaka alip acel dong otum, ci lamalaika bigonyo Catan woko ki i buce. 83 Ci Catan bikati woko cito ka bwolo rok ducu matye i but lobo, ma en aye Gog ki Magog, bicokogi bene pi lweny, jo ma welgi pe kwane ma girom ki kweyo me dog nam. 9Gumol gucito guket woko iwi lobo ka malac ci gurumu gony pa jo pa Lubanga ki gang ma en maroni, ento mac oa ki i polo ci owangogi woko liweng. 10Catan mayam obwologini bene kibolo woko i nam me mac ki gweng calfa ma mac oliyo, kama lee ki lanebi ma lagoba bene gitye iye ca; gibibedo ki arem nakanaka dyeceng ki dyewor.

Ngolo kop me agiki

114

Dok aneno komker mo madit matar, ki ngat ma obedo iwiye. Lobo ki polo gua ki inyime guringo woko, ento pe dok kinongo kabedo mo pirgi. 12Ci aneno jo ma oto, jo ma rwomgi piny ki jo ma rwomgi malo, kun gucung inyim komker, onongo bene tye kenyo buk mogo ma kiyabo igi woko. Kiyabo bene buk mo mukene ma en aye buk me kwo. Kingolo kop ikom jo ma oto kun kilubu gin mayam gin gutiyo, kit macalo onongo kicoyo i buk magi. 13Nam bene odwoko jo mayam guto i iyeni woko cen. To ki kabedo pa jo ma oto bene gumiyo jo ma oto mayam tye botgi; ci kingolo kop pa dano acel acel kun kilubu gin mayam gin gutiyo. 14Kibolo To ki kabedo pa jo ma oto woko i nam mac. Nam me mac aye meno to me aryo. 15Ngat mo mayam pe kinongo nyinge kicoyo i buk me kwo, kibolo woko i nam me mac.