Acoli Bible Revision
Jabuli 96
Lubanga en Rwot Madit
(1 Tek 16:23-33)
Wuwer bot Rwot wer manyen;
wuwer bot Rwot, wun lobo ducu!
Wuwer bot Rwot, wupwo nyinge;
wutit nino ki nino ni en dong otyeko larowa.
Wutuc pi deyone bot lurok
wutit pi tice me aura bot rok ducu!
Rwot dit, myero kipake tutwal
myero kilwore makato lubanga mukene ducu.
Pien lubanga pa lurok ducu gin cal jogi apaya,
ento Rwot aye ocweyo polo.
Deyo ki dit tye bote
tek ki ber tye ikabedo mere maleng. 1
Wun kaka me rok ducu,
wumii deyo ki tek bot Rwot!
Wumii deyo bot Rwot muporo nyinge;
wukel gityer, wubin wa i dyekale!
Wuwor Rwot en ngat maleng ka otuc ki deyone;
komwu omyel inyime, wun lobo ducu!
Wutit ikin lurok ni, “Rwot tye kaloc!
Ada, lobo ocung matek ma pe yenge;
en bingolo kop ikom dano maromrom.”
Polo iye obed yom, lobo bene obed ma cwinye yom,
wek nam omor, ki jami ducu matye iye;
wek poto obed ki yomcwiny, ki jami ducu matye iye!
Man bimiyo yadi ma i bunga ducu, giwero wer ki yomcwiny
inyim Rwot, pien tye kabino kangolo kop ki lobo.
En bingolo kop matye atir ikom lobo;
bingolo kop ikom rok ducu ki adane.
Source notes (1)
- Cross-reference Jab 29:1-2
Acoli Bible Revision. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.