Jabuli 95

Wer me pako Lubanga

1Wubin waweru bot Rwot;

wek cwinywa obed yom ikom got me larewa!

2Wabin wunu inyime kamiyo pwocwa;

wawer bote wer me pak ki yomcwiny!

3Rwot en aye Lubanga madit,

en Rwot madit makato lubanga mukene ducu.

4Nota me lobo tye i twerone;

lacol wi godi gin mere bene.

5Nam mere, pien en ma otiyo,

lobo bene mere, ma en ocweyo ki cinge.

6Wubin wunu waryebe piny wawore,

warumu congwa inyim Rwot, en ma ocweyowa. 712

Pien en aye Lubangawa,

wan jone ma en kwayo,

dok wan romi ma en aye gwoko.

Wuwiny dwone tin ni, 83

“Pe myero wumii cwinywu obed nwang macalo yam wutimo i Meriba,

macalo wutimo ikare ma wutye i Maca i tim.

9Ikare meno kwariwu yam gutema,

kun gimito lanyut,

kadi bed guneno tica ma atiyo pirgi ki wanggi.

10Cwinya okwero lwak meno woko pi mwaka pyere angwen;

omiyo awaco ni, ‘Gin lwak ma gungak woko ki i cwinygi, ma pe bene gulubu cika.’ 114

Ma omiyo akwongo kwong ki kiniga ni,

‘Pe gibidonyo i lobo kama abimiyogi iye yweyo.’”