Jabuli 94

Lubanga langolkop pa jo ducu

1Ai Rwot, in Lubanga ma lacul kwor,

in Lubanga ma lacul kwor, nyut akemoni.

2A malo, in langolkop me lobo;

cul kwor ikom jo ma wake muporo timgi.

3Jo maracu gibibedo ki yomcwiny pi kare marom mene,

pi kare marom mene ka, Ai Rwot?

4Giloko lok me cac ki wakegu,

lutim maracu ducu gin jo ma luwake.

5Ginginyo joni woko, Ai Rwot,

giketo can ikom joni ma gin ginaleyani.

6Gineko wa mon to ki jo ma gin lubedo,

gineko wa lutino kic bene.

7Gin waco ni, “Rwot pe neno;

Lubanga pa Yakobo pe ngeyo gin mo iye.”

8Wuniang, wun jo ma wiwu pe tiyo!

Wun luming mono wubidoko ryek awene?

9En ngat muketo it mono pe winyo?

En ngat mucweyo wang kono pe neno?

10En ma pwodo lurok, pe bipwodowu?

En ma pwonyo dano ki ryeko, pe ngeyo gin mo? 111

Rwot ngeyo tam pa dano,

ni gicalo aluu dog me yweyo keken.

12Dano ma in itiro tye ki gum, Ai Rwot,

ki dano ma ipwonyo ki lok me ciki.

13Imiyo giywe ikare me can,

nio ka kikwinyo bur me mako jo maracu.

14Rwot pe bibwoto jone,

pe biweko jo ma gin mere kikome.

15Kibingolo kop atir pi jo ma kitgi atir,

jo ma cwinygi atir gibilubune.

16Anga matwero tinge ikom jo maracu?

Anga ma bicung ma kakara ikom lutim maracu?

17Ka kono Rwot pe okonya,

tipuna kono onongo ocito woko oyot i lobo me lingo.2

18Ikare ma atamo ni, “Tyena tye kacer,”

mar meri ma pe loke okonya adada, Ai Rwot.

19Ka abedo katamo pi jami mapol,

in kikomi aye ikweyo cwinya.

20Jo maracu ma gin luloc gitwero ribe kwedi ningning,

ma giloko lok marac doko cik?

21Gicoke kacel kaneko dano ma kite atir,

dok gingolo kop me to ikom dano ma peke ki bal.

22Ento Rwot aye dong cela,

en got me kalarena.

23En bidwoko balgi i wigi ken gi,

ci bityekogi woko pi timgi maracuni;

Rwot Lubangawa bityekogi woko.