Jabuli 97

Lubanga en laloc madit

1Rwot tye kaloc; wek lobo obed ki yomcwiny;

wek lobo ma i dog nam ducu cwinygi obed yom!

2Pol ki mutu ma ocido licuc orumu en woko dyere;

kit ma atir ki ngolo kop matye atir aye miyo komkere cung matek.

3Mac telo nyime,

kun wango lumeroke ma gugure dyereni woko.

4Dero ma mere mil menyo lobo;

lobo neno ci yenge.

5Godi leny inyim Rwot calo odok kic,

inyim Rwot me lobo ducu.

6Polo tito pi porene;

ki lwak me rok ducu gineno deyone.

7Jo ducu ma woro cal jogi ma kipayo lewic bimakogi,

gin jo ma wake pi cal jogi ma gupayo;

dok lwak lubangagu ducu giryebe piny inyim Rwot.

8Jo Cion giwinyo ci gibedo ki yomcwiny,

ki taun madito ducu me Juda cwinygi yom ma pe twere,

pi kop ma ingolo, Ai Lubanga.

9Pien in Ngat Mamalo Twal ibedo laloc me lobo ducu, Ai Rwot;

in idit ikato lubanga mukene ducu.

10Rwot maro jo ma dag gin marac;

en gwoko kwo pa jone ma gene;

en larogi woko ki i cing jo maracu.

11Derone ryeny pi jo ma kitgi atir,

en bene miyo yomcwiny bot jo ma cwinygi atir.

12Wubed ki yomcwiny i Rwot, wun jo ma kitwu atir,

wupwo nyinge maleng!