Jabuli 86

Lega pi kwayo kony ki bot Lubanga

1Winy legana, Ai Rwot, dok igam doga,

pien an lacan, piny bene obwoya woko.

2Lar kwona ki i to, pien atye ki mar me ada ikomi,

lara pien an latici dok ageno in.

3In Lubangana, pimeno bed ki kica ikoma, Ai Rwot,

akok boti dyeceng jwi.

4Mii cwiny latici obed yom, Ai Rwot,

pien legana cito malo boti kun amiyi kwona ducu.

5Ai Rwot, in iber dok iweko bal pa dano,

dok mar meri ma pe loke dwong pi jo ducu ma kok boti.

6Cik iti iwiny legana, Ai Rwot;

winy kokona ma abako kwede doga boti.

7Ikare ma atye i can akok boti,

pien igamo doga.

8Pe tye lubanga mo ikin lubanga mukenenigu macalo in,

dok pe tye kit tic mo marom ki tici. 91

Rok ducu ma icweyogi gibibino gibiryebe piny inyimi,

Ai Rwot, ci gibipako nyingi.

10In idit dok itiyo jami tango me aura mapol,

in aye Lubanga keni.

11Pwonya ki ciki, Ai Rwot,

wek atii gin ma imito;

mii abed lawiny ki bene abed lagen ikomi ci miyo abitiyo boti ki woro madit.

12Amiyo pwoc boti ki cwinya ducu, Ai Rwot Lubangana,

abibedo kamiyo deyo boti kun atucu nyingi nakanaka.

13Mar meri ma pe loke dit tutwal ikoma,

in aye ma ilara kare ma onongo atye kamatut ite bur lyel.

14Ai Lubanga, jo ma lunywar guero lweny ikoma;

dul pa jo ma lubwami gimito neka woko,

kun bene pe giketi anyim me telogi igin ducu.

15Ento in, Ai Rwot, in Lubanga ma lakica dok i maro dano,

kiniga pe maki oyot, dok mar meri ma pe loke, ki geni, dwong.

16Loke inena ci kica omaki ikoma;

ci imiya teko dok ilara,

pien atiyo boti, kit macalo yam maa otiyo kwede botini.

17Nyuta lanyut ma tito pi beri bota, Ai Rwot,

wek lewic omak jo ma gidaga

ka gibineno ni, in dong ityeko kweyo cwinya dok ikonya.