Jabuli 85

Lega pi timo kica ikom jo Icrael

1Rwot, yam ibedo ki kica ikom loboni,

idwoko gum ikom jo pa Yakobo.

2Yam iweko bal pa lwaki,

dok itimogi kica ikom roc ducu ma gutiyo.

3Yam igiko bedo ki akemo ikomwa,

ci iloke ibwoto kinigani malyeti.

4Mii wabed ki gum kit mayam con ca, Ai Lubanga lalarwa,

cwinyi pe omyero dong obed kawang ikomwa!

5Kiniga mono bimaki ikomwa matwal?

Ibimedo kinigani bedo ikom yalwak ki yalwak ducu?

6Pe ibimiyo wanongo gum doki aye,

wek wan lwaki wabed ki yomcwiny piri?

7Ai Rwot, nyut botwa mar meri ma pe loke,

dok imiwa lari.

8Wek awiny gin ma Rwot Lubanga bilokone,

pien en biloko lok me kuc bot lwake,

bot jone ma gene, ma giloke ki i cwinygi gidwogo bote.

9Adada, en tye ma oyube pi laro jo ma lwore,

wek deyo me larne obed i lobowa.

10Mar ma pe loke ki gen gibiribe kacel,

kit ma atir ki kuc bene gibirwate.

11Gen bia ki i lobo dongo malo,

Lubanga matye ki kit ma atir bineno piny ki i polo.

12Eyo, Rwot bimiyo botwa gin maber,

ki lobowa bene biceko cam madwong.

13Kit ma atir bitelo nyim Rwot,

dok biyubu yoo ma en biwot iye.