Jabuli 84

Miti pi Ot pa Lubanga

1Odi ber tutwal Ai Rwot me mony!

2Cwinya mito mada ni abed kunu!

Amito mada me bedo i dye kal pa Rwot.

Awero wer me pako Lubanga makwo ki yomcwiny madwong

kun amiyo iye kwona ducu.

3Kadi lakalagwec bene tye ki ode,

ki aliboro bene tye ki ode kama en butu iye,

ki kama en twero bolo iye tonge,

macok ki keno tyeri, Ai Rwot me mony,

Rwota ma Lubangana.

4Jo ma bedo i odi gitye ki gum,

ma gibedo kawero wer kun gipaki kare ducu!

5Komgi gum adada gin jo ma ginongo tek ma a ki boti,

gin jo matye ki cwiny me cito wa i Cion ka woro in.

6Ka giwok gikato ki i nota me Baka mutwoni,

gimiyo doko wang it;

kot me poto kot bene cwer iye miyo pii pong ikabedo ducu.

7Gimede gidoko tek ikare ma giwoto;

Lubanga maloyo lwak lubangagu ducu binen i Cion.

8Winy legana, Ai Rwot Lubanga me mony;

cik iti iwinya, Ai Lubanga pa Yakobo!

9In aye i kwotwa, Ai Lubanga;

nen ki kica danoni ma kiwiro ma in aye iyeroni!

10Bedo i dye kali pi nino acel keken ber

kato bedo kamukene pi nino alip.

Twora abedo lagwok dogola Ot pa Rwot,

kato ma abedo i kema kama tim maracu tye iye.

11Rwot Lubanga aye ceng mewa dok kwotwa;

en onyo kicane ikomwa dok miyo wabedo ki deyo.

Rwot pe twono dano ma gilube ma cwinygi leng,

kit gin mo maber.

12Ai Rwot me mony,

dano ma geno in tye ki gum madwong!