Jabuli 83

Lega pi loyo lukwor pa jo Icrael

1Ai Lubanga, pe iling;

pe ibed mot ki kuc ma iling woko, Ai Lubanga!

2Nen lukwori gitye kalweny ikomi;

jo ma gidagini dong gujemo woko.

3Gitye kayubu yub mogo maracu imung ikom lwaki;

gicoke kacel giporo lok maracu ikom joni ma dong igwokogi wokoni.

4Giwaco ni, “Wubin, wek watyek rokgi woko;

wek pe dong kipo pi nying Icrael matwal.”

5Eyo, gin ducu gipiro lok ki cwiny acel;

dok bene giketo gicike ikin gi me lweny ikomi.

6Gin jo Edom, ki jo Icmael, jo Moab ki jo Agri,

7jo Gebal, jo Ammon ki jo Amalek,

jo Piliciti ki jo ma gibedo i Turo.

8Jo Aciria bene onongo guribe kwedgi;

gin aye dul mony matek pa likwayo pa Lot. 91

Tim gin ma itimo ikom jo Midian ikomgi,

macalo itimo ikom Cicera ki Jabin i dog kulu Kicon,

10ma kityekogi woko i En-dor,

ma kiradogi gudoko macalo cet dyang matye i lobo. 112

Mii luditogi me awora gubed calo Oreb ki Jeeb,

dok ilo rwodigi woko macalo iloyo Jeba ki Jalmuna;

12ma guwaco ni, “Wek wakwanyu obed pirwa kenwa,

en olet pa Lubangani.”

13Ai Lubangana, mii gubed macalo apwa ma yamo lapiru kolo,

calo cung kal ma yamo tero.

14Kit macalo mac wango kwede bunga,

dok macalo leb mac matye kalyel iwi godi,

15in bene ibiryemogi ki yamo matek gicito woko kitmeno,

ci ibimiyo yamo lapiru mager kodo miyogi lworo ki myelkom.

16Mii lewic omakgi, Ai Rwot;

wek guloke guyenyi ci gutii boti.

17Wek kiket lewic ikomgi dok omii cwinygi obale woko,

wek guto ican ki lewic madwong.

18Wek gunge ni,

in keni aye ma nyingi Rwot,

in aye Ngat Mamalo Twal maloyo wi loboni ducu.