Jabuli 81

Wer pi karama me nino madito

1Wuwer wer ki dwon malongo bot Lubanga ma en tekwa;

wuwer wer me pak ki yomcwiny bot Lubanga pa Yakobo!

2Wuwer dok wugo ajaa bene, wugo opuk ki nangagu. 31

Wukut tum ikare ma dwe pud opor apora,

dok ka dong ogudu got, ki i ninowa madito.

4Pien man obedo cik i Icrael,

gin ma Lubanga pa Yakobo yam ociko.

5En oketo cik man i kaka pa Yucepu,

ikare ma en owoto ocito kalweny ikom lobo Ejipt.

Awinyo dwon mayam con pe angeyo, ma waco ni,

6“Atingo yec mapek woko ki i gwoki;

amiyo iketo aduku woko piny. 72

Ikok bota ikare ma itye ican, ci alari;

agamo dogi ki mor piny ki i kabedo me mung ma akane iye,

ci atemi bene inget pii me Meriba.

8Wuwiny, wun jona, ka ajukuwu;

wun jo Icrael, amitoni wuwiny gin ma awaco botwu! 93

Pe myero kinong ikinwu kit lubanga mo ma pe ngene,

pe wuryebe piny ka woro lubanga pa lurok.

10An a Rwot Lubangawu,

ma akwanyowu, akelowu woko ki i lobo Ejipt.

Wungam dogwu malac, ci abipitowu ki cam.

11Ento jona pe guwinyo lok mayam aloko botgi;

jo Icrael onongo dong pe gitwero lubu cika kadi ki acel.

12Pimeno omiyo awekogi woko pi tek wigi,

wek gutii gin ma cwinygi mito.

13Kono nene jona guwinyo loka,

kono jo Icrael nene gulubu yona!

14Kono onongo aloyo lukworgi woko oyotoyot,

kono aryeyo cinga ci atayo lumerokgi woko ducu.

15Kono onongo jo ma daga gumwole amwola inyima,

dok kono onongo can ma bipoto ikomgi obedo matwal.

16Onongo atwero pitowu ki ngano maber tutwal,

dok onongo atwero miyo wuyeng ki moo kic matye ikom got.”