Jabuli 80

Lega pi roco rok me Icrael

11

Winywa, in lakwat pa jo Icrael, in ma itelo wi jo pa Yucepu

macalo itelo wi lwak romi!

In ma ibedo iwi komkeri i ka wi lukerubi,

2nyute bot kaka pa Epraim, pa Benjamin ki pa Manace!

Nyut teki, ci ibin ilarwa!

3Dwok lobowa wek odok tek kit ma con ca, Ai Lubanga;

nenwa ki wang me kica ci wabilare!

4Ai Rwot Lubanga me mony,

ibibedo ki kiniga ikom lega pa lwaki pi kare marom mene?

5Imiyo wacamo pig wangwa macalo wacamo kwon,

imiyowa pig wang pong kikopo madit ni wamati.

6Imiyo jo ma bedo ingetwa dong gicayowa marac;

ki lukworwa bene ginyerowa anyera ikin gi ken gi.

7Dwok lobowa wek odok tek kit ma con ca, Ai Lubanga;

nenwa ki wang me kica ci wabilare!

8In aye mayam ikelowa ki i Ejipt macalo tyen olok;

ka iryemo lurok woko ki i lobogi ci ipitowa iye macalo oloki.

9Ipuru kakare woko maber,

ci oroyo lwite odonyo matut i ngom,

omiyo odongo oumu lobo woko ducu.

10Tipune oumu godi woko ducu,

oumu bene wa yadi cedar madito ki jangegu.

11Jange ojany oo wa i nam,

ki pote ma pud lot alota oo wa i kulu Euprate.

12Pingo imuku cel ma orumu woko,

omiyo iweko jo ducu makato kikenyo gupwono nyige?

13Opego ma gibedo i bunga ginyono woko piny,

ki lee tim ducu gicamogi.

14Loke idwog botwa, Ai Lubanga me mony!

Nen piny ki i polo ci inenwa;

bed ki tam ikom olok man,

15bin ilar tyen olok man ma in aye ipitoni.

16Lumerok gutyeko wangone woko ki mac,

dok bene gutongo gureto woko piny;

nen gi ki kiniga ci ityekgi woko!

17Gwok jo ma dong ityeko yero,

en rok ma dong imiyo odongo odoko mateki.

18Pe dok wabiloke wabwoto in;

gwokwa wabed kwo, ci wabipako nyingi.

19Dwok lobowa wek odok tek kit ma con ca, Ai Lubanga;

nenwa ki wang me kica ci wabilare!