Jabuli 79

Lega pi laro lobo

11

Ai Lubanga, lurok gubino gumayo lobo pa lwaki woko;

gubalo Ot meri malengi woko;

gujwero Jerucalem woko odong obur.

2Gubwoto kom lutici ma oto me acama pa winyi me polo,

dok gubwoto kom joni ma geni bot lee tim wek gucam.

3Guonyo remogi woko macalo kionyo pii,

orumu Jerucalem woko,

dok dano mo pe odong ma onongo myero oyikgi.

4Rok ma gibedo ingetwa giloko lok agec ikomwa,

ma gicayowa dok gijwiyowa.

5Ai Rwot, kiniga bimaki nakanaka?

Akemoni me nyeko bimede kun wang macalo mac?

6Kiniga myero omaki ikom rok ma pe gingeyi,

ki ikom ker ducu ma pe giworo in.

7Gutyeko jo pa Yakobo woko,

gumiyo lobowa dong odoko obur.

8Pe icul kwor ikomwa pi bal pa kwarowa;

wek kica omaki ikomwa oyotoyot,

pien piny dong oloyowa woko.

9Konywa, Ai Lubanga lalarwa,

pi kelo deyo i nyingi;

larwa, dok iwek balwa,

wek dano guwor nyingi.

10Pingo lurok myero gupeny ni,

“Lubangagi tye kwene?”

Cul kwor ikom lurok i nyimwa ma waneno

pi oyo remo pa lutici!

11Winy cur pa lumabuc;

gwok jo ma dong kingolo kop me to iwigi ki tweroni maditi!

12Ai Rwot, cul kwor maromo tyen abiro ikom jo ma gibedo ingetwa

pi lok me yet ma giyeti kwede.

13Ci wan lwaki, ma wan romini ma ikwayowani,

wabimiyo pwoc boti nakanaka;

wabipako nyingi nakanaka,

wan ki likwayowa ducu.