Jabuli 77

Kweyo cwiny ikare me can

1Akok matek bot Lubanga,

akok bote matek, ci en owinyo kokona.

2Ayenyo Rwot ikare ma atye ki can;

i dyewor atango cinga bote kun alego ma pe aol;

ento meno ducu mwa, cwinya pe romo kwe.

3Ka aparo pi Lubanga, ci acur;

ka alwodo lok, ci nen cwinya bale woko.

4En miyo abedo ma pe anino i dyewor benebene;

atye ki par mapol tutwal omiyo pe atwero loko lok mo.

5Abedo katamo pi kare macon,

dok apo ikom lwak mwaka ducu ma okato.

6Abedo katamo tam matut ki i cwinya i dyewor;

alwodo lok dok apenye kekena ki icwinya ni,

7“Rwot mono bikwerowa woko matwal kare ducu?

Wa cwinye dok pe bibedo yom ikomwa bene?

8En dong pe marowa ki mar mere ma pe lokeni?

Wa cikene mono dong ogik woko ikomwa pi kare me kwowa ducu?

9Lubanga mono dong wiye owil woko pi nyutu kicane ikom dano?

En dong mono pe romo timowa kica,

pi kiniga ma omakeni?”

10Dok awaco ni, “Gin ma cwero cwinya makato ducu en aye ni,

twero pa en Ngat Mamalo Twali dong peke botwa kit ma con ca.”

11Abipo ikom tic madito ma Rwot otiyo;

ada, abipo ikom tici ducu me aura mayam itiyo ikare macon.

12Abibedo katamo pi gin ducu ma dong itimo,

dok abilwodo lok ikom tici madito ducu mayam itiyo.

13Kit gin ducu ma itiyo, leng, Ai Lubanga!

Pe tye kit lubanga mo madit calo in!

14In keken aye Lubanga ma tiyo tango me aura;

dok inyutu teki ikin lwak me rok ducu.

15Yam ikoko lwaki ki i can pi tweroni,

gin likwayo pa Yakobo ki Yucepu.

16Ka pii me nam oneni, ci obedo ki lworo, Ai Lubanga,

ka oneni obedo ki lworo adada, dok nam matut ducu oyenge.

17Kot oa ki i pol ocwer i lobo;

piny omor ki i pol matek,

ci lutkot owil ikabedo ducu.

18Dwoni omor owinye wa i yamo lapiru mager;

lutkoti bene omeny ocaro lobo woko ducu;

lobo oyenge ki jo ma bedo iye ducu komgi omyel.

19Iwoto ikato ki i dye nam,

ingolo ki i dye nam ma dongo matut;

ento ojwe tyeni pe omedo ki nen.

20Itelo wi lwaki macalo lakwat romi,

kun imiyo Moses ki Aron me gwokogi.