Jabuli 76

Lubanga aye laloyo

1I Juda dano gingeyo Lubanga maber tutwal,

nyinge bene dit i Icrael.

2Kabedone tye i Jerucalem,

en bedo iwi got Cion.

3En oturu atero ma lake wil awila woko ki kunu,

oturu wa kwot, pala lucwan ki jami lwenygigu ducu.

4Itye kideyo makato, Ai Lubanga,

ki dit me loc tye i cingi,

makato godi ducu ma rii nakanaka.

5Acikarigi macir ducu kiyako jamigi woko;

gitye kanino nino to;

pe tye ngat mo mudong ki ikin gin lumony

matwero tic ki jami lweny.

6Ikare ma i jukugi, Ai Lubanga pa Yakobo,

aguragura ki jo ma ngweco kwedgi gupoto guwile woko ducu.

7Ento in, Rwot, dano lwori matek!

Anga matwero cung inyimi

ka onongo kiniga dong omaki woko?

8In dong ingolo kopi woko wa ki i polo;

jo ducu ma bedo i lobo gulworo,

omiyo guling mot,

9ikare ma ia malo kangolo kop,

pi laro jo ducu ma kiunugi i loboni.

10Adada akemo pa dano miyo jo giloke gidok kapako in;

jo mudong ma gubwot ki i dog lweny gibicoke boti.

11Wukwong kwong bot Rwot Lubangawu,

dok wucob gin ma wukwongo bote;

wek dano ducu ma gibedo cok,

gukel motgi bote;

Lubanga myero kilwor,

12pien en dwoko rwodi ma luwake woko piny,

dok miyo luker me lobo gibedo ki lworo madwong.