Jabuli 75

Lubanga ma langolkop

1Wapwoyi, Ai Lubanga, wapwoyi pien itye cok kwedwa!

Jo ducu gitito pi dit me nyingi

ki pi tic me aura ducu madong ityeko tiyogi.

2Lubanga owaco ni, “Atyeko moko nino me ngolo kop,

abingolo kop ma atir dok kakare.

3Kadi bed lobo yenge, kacel ki jo ducu ma bedo iye;

abigwoko wir ma lobo ocung iye ducu wek ocung matek kakargi liking.

4Dong atito bot luwake ducu ni, ‘Pe wuwake,’

dok bot jo maracu bene awaco ni, ‘Pe wulyere ma wuwake awaka.’

5Dok atito botgi ni pe myero gukete ken gi malo tutwal,

dok bene gugik loko lok anywaranywar woko ki ikin gi.”

6Medo rwom pa dano pe bino kun a ki tung kunyango onyo tung kupotoceng,

kadi ki tung tim onyo tung godi;

7ento Lubanga kene aye ma ngolo kop pa dano,

Lubanga dwoko dano acel piny kun juke pi bale dok tingo dano mukene ilo malo pi tito ni pe obalo ilok meno ma kikelo ikome.

8Rwot pi kinigane dong omako kikopo i cinge ma opong ki kongo bwino,

ma yenyo ayenya ki bwoyo, ma kirubu maber.

En miyo jo maracu ducu matye i lobo gimato,

gimato nio wang ma gutyeko woko liweng.

9Ento an abibedo katito lok ikom Lubanga pa Yakobo nakanaka,

dok abiwero wer me pake ikare ducu.

10En Lubanga aye bityeko teko pa jo maracu woko liweng,

ento Rwot bimedo teko bot jo ma kitgi atir.