Jabuli 74

Koko bot Lubanga ikom lukwor pa jone

1Ai Lubanga, pingo ibolowa woko matwal?

Pingo imiyo akemoni duny ikomwa wan romini ma in aye ikwayogi?

2Po pi lwaki mayam iyerogi cake wacon,

gin jo mayam ikokogi ki ican wek gubed joni kikome.

Po pi got Cion, kabedo mayam ibedo iye.

3Bin iwot i kabedo man madong odoko obur matwali;

lukwori gujwero jami woko ducu ki ikabedoni malengi.

4Lukwori gudange matek ki loc ikabedo mayam joni gicoke iye kawori;

guketo benderagi malo me nyutu ni dong odoko meggi.

5Gicalo lutong yat ma i bunga

ma gitye ka tongo yadi ki latong.

6Gubaro bao ma kipayo maber ki iye,

gutiyo ki latong ki nyol.

7Gumuku ka gureto Ot pa Lubanga woko piny, ci gucwinyo woko ki mac;

gupyedo kabedo meno maleng ka mayam dano giworo iye nyingi.

8Guwaco ni, “Wabinginyo joni watyekogi woko likwicikwici”;

guwango kabedo ni maleng woko liweng ki i lobo tuwa.

9Jami maleng me woro ducu dong pe nen,

pe tye lanebi mo ma odong,

pe tye ngat mo ikinwa ma ngeyo kare ma can man bitero.

10Ai Lubanga, lukworwa mono gibibedo kacayowa pi kare marom mene?

Lukworwa myero gubed kayeto nying in Lubanga nakanaka?

11Pingo idolo cingi woko pe ikonyowa?

Idolo cingi idwoko tung ngeyi do pingo?

12Ento in Lubanga, ma ibedo Rwotwa cake wacon,

ibedo katiyo tici me laro dano iwi lobo. 131

Ipoko dye nam woko ki teki;

inyoto wi megi kulugu woko ducu i pii. 142

Inginyo wi Leviatan ma min kuluni woko ducu do,

ka imiyo odoko cam pa lee ma gibedo i tim.

15Iyabo wang it, imiyo piine obedo kagunye odoko ora,

ci imiyo pii otwo woko liweng ki i kulu mukene mayam gimol.

16Dyeceng meri ki wor bene meri;

in aye iketo ceng ki dwe ikabedogi.

17Iketo wang apoki ducu me lobo;

in bene ma iketo oro ki cwir gubedo tye.

18Ai Rwot, po ikit ma lukworwa gicayi kwede,

gin jo ma pe gilwori ma giyeti nono.

19Pe imii joni marom ki akurini bot lukwor magi mageri ma girom ki lee timi;

wii pe myero owil matwal ikom lwaki ma gin lucan.

20Po ikom gicikeni mayam icike kwede ki wan con;

pien tim bwami tye ikabedo macol ducu matye i lobowani.

21Pe iwek lewic omak jo ma kidiyogi;

wek lucan ki jo ma piny obwoyogi gupak nyingi.

22A malo, Ai Lubanga, wek ipid pidoni;

po bene kit ma jo ma pe gilwori gicayi kwede dyeceng jwi!

23Wii pe owil ikom dange me kiniga ma lumoneni gidange kwede mateki,

en woo pa gin lukwori ma gimede kwede ameda ma pe gilingi.