Jabuli 73

BUK ME ADEK

Jab 73—89

Ngolo kop atir pa Lubanga

1Adada Lubanga ber bot dano ma cwinygi atir,

dok en ber bot jo ma cwinygi leng.

2Ento an onongo dong acok poto woko;

niyena onongo dong tye karwenyo woko.

3Pien nyeko onongo omaka woko ikom jo ma luwake,

ikare ma aneno jo maracu gilony mere alonya.

4Pe gitye kawinyo kit arem mo liweng;

komgi yot dok tye mere mapwot apwota.

5Pe gibedo kaneno can kit ma jo mukene gineno kwedeni;

pe gitye ki ayela ikomgi macalo jo mukene.

6Pimeno wake odoko calo gideyo ma giruku mere i ngutgi;

tim bwamigi bene oboyo komgi woko calo bongo.

7Tam ma a i igi nen wa i wanggi ni opong ki yub me tim maracu,

ki cwinygi bene opong ki yub me mingo keken.

8Gingalo jo mukenegu kun giloko lok maracu;

giyubu yubgi me buru dano dok giunugi bene.

9Giloko lok marac ikom Lubanga matye i poloni;

lok bura ma a idoggi oromo i lobo woko ducu.

10Pimeno omiyo lwak pa Lubanga bene gibedo kapakogi pi gin ma gutiyo;

pe kineno bal mo ikomgi kadi ki acel.

11Giwaco ni, “Lubanga kono twero ngeyone ningning?

En Ngat Mamalo Twal tye ki kit ngec mo?”

12Nen jo maracu aye tye kitmeno;

kare ducu gilimo lwak jami mapol,

dok pud gimede ameda ki nongo lonyo makato.

13Pimeno dong abedo ma iya leng gira mere nono,

dok alwoko cinga ma pe abalo.

14Gibedo kaketo ayela ikoma dyeceng jwi,

kun gipwoda nino ducu odiko ki odiko.

15Kono nene aloko lok mo marac macalo jo meno maracuni;

kono pe abedo ki ada mo bot joni.

16Ento ateme ki teka ducu me niang lok man,

kadi bed kumeno an anongo gira ni tek tutwal kitung bota ci oolo koma tutwal;

17nio ka acito i Ot maleng pa Lubanga;

ka dong acako niang ikom gin ma bitime ikom jo maracu.

18I adane in yam iketogi ikabedo mapwot ma gicer acera ki iye;

ibimiyo gipoto piny ci gibito woko ducu.

19Kibityekogi woko oyotoyot labongo gale;

ibirwenyo wanggi woko oyotoyot ki i lobo man ki gin maracu makelo lworo.

20Jonu gibedo macalo lek ma rwenyo woko oyot ka dano oco odiko, ki iwang nino ci temo tamo pire;

dong Ai Rwot ka i a malo ci jonu girwenyo woko ki iwangi wa ki itami bene.

21Ikare ma abedo ma iya kec,

ma ton cwiny bene omaka adada,

22onongo aming dok pud akwiya piny,

onongo abedo calo lee tim inyimi.

23Ento kare ducu abedo cok kwedi;

kun imako cinga ma lacuc bene.

24Itela ki tam ma ibedo kamiya,

wek i agikine ka ato ci ibijola ideyoni.

25Gin ango mukene madok atye kwede i polo, kono in keken?

Gin mo ma amito i lobo kany tutwal makato in pe tye.

26Koma ki cwinya twero doko goro,

ento Lubanga aye tek me cwinya,

dok Rwot aye dul ma kipoka matwal.

27Adada jo matye kamabor ki in gibito gitum woko;

dok ibijwero jo ducu ma pe gigeno in.

28Ento ki tung bota, bedo cok ki Lubanga aye ber;

in Rwot Lubanga matwero ducu aye lagwok mera,

ci weko abitito pi tici ducu ma itiyo.