Jabuli 72

Lega pi rwot

1Pwony rwot wek ongol kop atir macalo in, Ai Lubanga;

dok inyut tic ki ada bot latini me ker,

2wek en ongol kop pa lwaki i yo ma atir,

dok oloo lwaki ma gin lucan i yo mupore.

3Wek godi ki ceregu gukel kuc bot dano,

pien lwaki gitye ki kit ma atir.

4Myero rwot owiny pido pa lucan dok ongol kopgi kakare,

wek olar bene jo mapiny oloyogi ki jo ma kidiyogi,

ento onginy jo ma unu dano mukenegu woko!

5Lwaki myero guwori nakanaka ikare pa yalwakgi ducu, Ai Lubanga,

pi kare ducu ma ceng ki dwe pud tye!

6Wek rwot obed macalo kot ma cwer i poti,

nyo calo ngido kot ma cwer bido ngom.

7Wek kit ma atir omede ameda ikare me loce,

dok kuc ki lonyo onya bene obed i lobone nakanaka calo dwe! 81

En biloyo lobo cake i dog nam tungi nio kwede wa i dog nam tungcel,

dok biloyo cake ki i kulu Euprate o kwede wa i agiki piny.

9Lumonene ducu gibigungo inyime kawore,

lukwore gibibutu aryeba ic ci gibimoko apwa.

10Luker me Tarcic ki pa jo ma bedo i cula nam,

myero gucul mucoro bote,

dok luker me Ceba ki me Seba gukel mot bote.

11Luker ducu myero guryebe piny inyime,

dok rok ducu myero gutii bote!

12En laro dano ma piny obwoyo ka okok bote,

konyo lapiny oloyo ki jo ma pe gitye ki ngat ma konyogi.

13Kica make ikom jo magoro ki ma piny obwoyogi,

ci laro kwo pa jo ma piny oloyo.

14En kokogi ki i tim bwami ki i aun ma kibedo kaunugi kwede;

kwogi pire tek bote ma pe wace.

15Wek rwoti obed kwo nakanaka!

Myero kimii jabu ma kikelo ki i Ceba bot rwot;

dok gibed kalega pire kare ducu ma pe gikeng,

kileg Lubanga wek oony gum mere ikome kare ducu!

16Wek cam bene ocek mabup i lobone,

opong wa iwi godigu woko ducu;

wek onyak nyig mabeco calo godi me Lebanon;

wek taun madito ducu opong ki lwak dano madwong ata,

ma gipol calo lum ma i tim!

17Wek nying rwot orii nakanaka,

ki ywekane orii kit macalo ceng rii kwede.

Jo me rok ducu myero gulwonge ni lagumkom,

dok bene gunong gum pire!

18Kipak Rwot, Lubanga pa Icrael!

En keken aye ma tiyo gin me aura.

19Kipak nyinge me deyoni nakanaka,

wek deyone bene opong lobo woko ducu!

Amen! Amen!

20Lega pa Daudi wod pa Yece ogik kany.