Jabuli 71

Lega pa dano ma otii

1Aringo alaro boti, Ai Rwot;

pe imii lewic omaka!

2Kit macalo in kiti atiri, lara dok ikonya;

cik iti iwiny legana, ci ilara!

3Bed got me kalarena,

dok ibed cel gogo matek ma gwoka;

pien in igot ki cel gogona.

4Lara ki i cing jo maracu do, Ai Lubangana,

lara ki itwero pa jo mager ma lubwami.

5Gena ducu tye ikomi, Ai Rwot;

abedo kageno in cake wa ka tinona.

6Cake ma kinywala abedo kajenge ikomi;

in aye mayam ikwanya ki iot nyodo pa maa.

Abibedo kapako in nino ducu.

7Abedo lanen bot jo mapol,

ento in aye kalarena matek.

8Abedo kapaki dyeceng jwi,

dok amiyi deyo bene dyeceng jwi.

9Pe ibola woko ikare ma dong atii woko kuman;

pe ibwota bene ikare ma teka dong otum woko.

10Lukwora gipiro lok mapol ikoma,

gin jo ma mito neka wokoni gicoke kacel kayubu lok ikoma.

11Gin waco ni, “Lubanga dong otyeko bwote woko;

wuring ikore wek wumake woko,

pien pe tye ngat mo ma myero olare.”

12Ai Lubanga, pe ibed bor kweda;

Ai Lubangana, bin oyotoyot ilara!

13Mii lewic omak jo ma gin dotani,

dok kityekgi woko liweng;

wek kicagi, dok can omakgi malit,

gin jo ma mito keto can ikomani.

14Ento an pud abimede ki bedo ki gen ikomi,

abimede kapaki nakanaka.

15Abitucu pi tic ma atir ducu ma itiyo,

abitucu bene pi tic me lari dyeceng jwi,

kadi bed welgi dong dwong ma okato ngeca woko.

16Abibino pi tito pi tic madito me aura pa Rwot Lubanga,

abitito pi kiti ma atir, pi kit ma meri ma atir keken.

17Ai Lubanga, ibedo kapwonyo an cake wa ka tinona,

pimeno pud atucu pi tici me aura ducu ma itiyo.

18Pe ibwota ata, Ai Lubanga,

kadi bed ikare ma dong atii ma, wiya otwi lwar,

ento bed kweda nio ka atucu pi teki

bot yalwak me kare man ducu ki me anyim.

19Ai Lubanga, tweri ki timi ma atiri

dong otyeko o wa malo i polo.

In aye ma itiyo jami madito ducu,

pe tye ngat mo macalo in, Ai Lubanga!

20In aye ma icwalo ayelayela ki arem madwong ikoma,

in giri bene ma ibidwoko teko ikoma;

dok ibikwanya woko ki ite ngom ka matuti,

ibikela woko kamaleng dok.

21Ibimiya abedo ki dit makato,

dok bene ibikweyo cwinya.

22Dok bene abipaki ki nanga

pi geni, Ai Lubangana;

abiwero wer me paki kun agoyo agoya ki opuk,

in Ngat Maleng pa jo Icrael.

23Abidange matek pi yomcwiny,

ikare ma nongo atye kawero wer me paki;

abipaki ki tipuna bene, pien dong ilara.

24Dok abitito pi timi ma atiri ma ikonya kwede dyeceng jwi,

pien lewic ki can dong otyeko makogi woko,

gin jo ma onongo giyenya wek giket can ikomani.