Jabuli 7

Lega pi ngolo kop atir

1Ai Rwot Lubangana, aringo alaro boti;

lara ki i cing lukwora ducu ma giryemo kora, ci ikonya;

2ka pe, ci gibikila woko calo labwor ma kilo lee,

gibiywaya woko kama ngat mo nongo peke matwero lara.

3Ai Rwot Lubangana, kace onongo atiyo gin mo ikin jami magi,

kace atimo bal ikom ngat mo,

4nyo ka atimo bal bot larema pi dwoko bote gin marac kom gin marac,

nyo ka atimo bwami ayako jami pa lakwora woko labongo tyen lok mo,

5ci mi lukwora guryem kora gumaka woko i yoo,

wek gureta piny i ngom ci guneka woko,

ka dong gibwota i ngom kenyo ma dong ato woko.

6Ai Rwot, a malo ki akemoni,

ci ilweny ikom lukwora ma gubino magwa ikomani;

Ai Lubangana, coo woko wek i konya, pien in aye iciko pi ngolo kop.

7Wek lwak me rok ducu gucoke gurumi woko dyere;

ci ibed malo i kabedoni ka icak loyogi ki kunu.

8Rwot, in langolkop pa jo me rok ducu;

Ai Rwot, ngol kopa muporo kit ma atir ma atye kwede,

dok ma lubu kit ma cwinya leng kwede. 91

Gik tim marac ma jo maracu gitiyo woko,

ento wek jo ma kitgi atir gucung matek.

In Lubanga ma kiti tye atir,

in iniang tam pa dano kacel ki mitigi.

10Lubanga aye kwot mera,

en laro jo ma cwinygi atir.

11Lubanga langolkop ma ngolo kop atir,

en Lubanga matye ki kiniga nino ducu ikom lubalo.

12Kace dano mo pe ongut,

ci Lubanga bipako pala lucwane.

En dong otyeko ciko atume tye atera;

13en dong oyubu jami lweny maracu me nek,

lak ateronegu ducu gilyel mac.

14Nen, latim marac tamo tam marac ki i cwinye,

dok opong ki yub me kelo ayela keken,

kun loko lok gobagoba me bwolo dano.

15En kwinyo bur matut i ngom,

ka dok loke poto i bur ma en okwinyoni kekene.

16Dong tame maraci miyo en poto i can,

ki tim bwamine dwogo gire ikome kene.

17Abipwoyo Rwot pien kite atir mada,

dok abiwero wer me pako nying Rwot,

ma en Ngat Mamalo Twal.