Jabuli 69

Koko pi kony ki i can

1Lara, Ai Lubanga!

Nen pii dong omwonya woko oo wa i nguta.

2Atye kalwiny woko i coto kamatut,

kama gin mo peke ma atwero cung ikome;

atye kamwony woko i pii matut,

ki biamwonyi me pii ma twage bene kato ki i ka wiya kun acok ki mwony.

3Dong aol woko ki koko pi kony,

dwona dong okak woko.

Wanga bene dong ocido woko,

pi kuru kony ma a ki bot Lubangana. 41

Jo ma daga nonono labongo tyen lok mo

gipol ma gikato yer wiya woko.

Jo ma gin lukwora ma giloko lok goba pi lweny ikoma;

gitek dok gimito neka woko.

Gimito adwok jami ma pe akwalo akwala cen

kadi pe akwalo gin mo.

5Bala ducu ma atiyo, Ai Lubanga, pe okane ki boti wa ki acel;

in giri ingeyo mingona liweng.

6Pe iwek aket lewic ikom jo ma geno in,

Ai Rwot Lubanga Matwero ducu!

Dok pe iwek akel lewic ikom dano ma giworo in.

Ai Lubanga pa Icrael!

7Aciro yet madwong mada pi nyingi,

omiyo lewic oumu wanga woko lipuk.

8Adoko calo larok bot utmegina,

dok macalo ngat ma labedo ki bot lutino awobe pa maa. 92

Arima pi odi mito neka woko ma wang i iya calo mac;

dok yet pa dano ma gin yeti kwede bene dong otyeko poto ikoma.

10Ikare ma amwole kena i cwinya kun arii kec,

meno odoko lok anywar ikoma.

11Ikare ma abedo karuke ki bongo cola,

aloke adoko lok aboka ikin gi.

12Jo ma bedo i dog cel gibedo kaloko lok ikoma ma pe wace,

lumero bene giwera awera ki wer.

13Ento kitung bota, abikelo legana boti, Ai Rwot.

Gam legana ikare ma iyero, Ai Lubanga.

Gam legana pi mar meri madwong ma pe loke,

pien igwoko cikeni pi laro joni.

14Lara wek pe alwiny woko i coto;

lara ki i cing lukwora,

lara bene ki i pii matut.

15Pe iwek biamwonyi otwage

omwony wiya woko;

pe iwek amwony woko i pii matut

nyo kadi ki donyo piny i bur lyel.

16Gam doga, Ai Rwot, pien mar meri ma pe loke ber;

loke bota pi kicani madwong.

17Pe ikane woko ki bot latic ma megi;

gam doga oyotoyot kombedi, pien atye i can.

18Nyik cok bota i koka,

ci lara ki i cing lukwora.

19Ingeyo kit anywar ducu ma kinywara kwede,

ki kit ma kimiya kwede lewic marac mada;

dong in ingeyo lumonena ducu.

20Cwinya obale woko pi yet ma kiyeta kwede,

omiyo dong pe atye ki kit gen mo.

Ayenyo ngat matwero nyutu kicane ikoma, ento pe anongo;

ayenyo jo ma omyero gukwe cwinya ci pe anongo ngat mo. 213

Gumiya kwir marac ma kaka cam,

dok ikare ma orwo pii oneka gumiya kongo bwino mawace ni amati. 224

Wek karamagi ma gicamoni otyekgi woko macalo owic;

karama me gityer ma gicamoni myero oloke odok owic ma makogi.

23Mii wanggi ocore woko, wek pe gunen piny;

mi pyergi onyonge obed ka myel amyela nakanaka.

24Too akemoni woko ducu ikomgi,

mii kinigani ma lyeti otyekgi woko. 255

Mii gonygi odok obur,

pe iwek ngati mo odong obed i kemagi.

26Giyelo dano ma in dong ityeko pwodo,

dok giketo can gimedo ameda ikom jo mayam dong ityeko keto ret ikomgi.

27Mede ki keto can ikomgi muporo balgi,

pe ikwany kop woko ki i wigi kadi ki acel. 286

Jwa nyinggi woko ki i buk ma nying jo makwo ducu kicoyo iyeni; pe iwek kicoo nyinggi ikin nying jo ma kitgi atir.

29An dong atye ican ki arem madwong;

wek lari oila malo, Ai Lubanga!

30Abipako nying Lubanga ki wer;

abidworo nyinge kun amiye pwoc.

31Pwoc man biyomo cwiny Rwot makato twon dyang,

nyo twon ma tunge olot, ma obonge dito.

32Wek jo ma kiunugi gunen,

ci gubed ki yomcwiny;

wun jo ma wutye kayenyo Lubanga,

wubed ki kwo manyen icwinywu.

33Rwot winyo koko pa jo ma piny obwoyogi,

dok pe cayo jone kikome ma kitweyogi i buc.

34Wek polo ki lobo ducu gupake,

nam ki jami makwo ducu matye kawot iye.

35Lubanga bilaro jo Cion

dok bigero gangi me Juda odoco; lutice gibibedo kunu,

gibicamo doko meggi;

36lutino pa lutice gibileyo doko meggi,

dok jo ma mare gibibedo iye.