Jabuli 68

Wer me loc

1Wek Lubanga oa malo, ci oket lukwore woko atata;

wek jo ma lukwore ducu guring woko ki inyime pi loc ma en oloyo!

2Macalo yito duny cito woko,

gin bene gibirwenyo woko kitmeno;

macalo odok kic leny woko ka kiketo inget mac,

wek jo maracu bene guto woko inyim Lubanga kitmeno!

3Ento wek jo ma kitgi atir gubed ki yomcwiny;

wek gunyate ki yomcwiny madwong inyim Lubanga;

wek gudange ma yomcwiny mito nekogi woko!

4Wuwer bot Lubanga, wuwer wer wupak nyinge;

wuil dwonwu malo ki wer bot en

matye kangwec ki gadigadine iwi pol;

nyinge Rwot, wudwore, dok wubed ki yomcwiny inyime!

5Lubanga, en won jo ma won gi peke, dok en bene magwoko mon to;

en Lubanga ma bedo i ot mere maleng.

6Lubanga miyo paco bot jo mudong ken gi mapiny oloyo, wek gubed iye;

en aye ma kwanyo mabuc woko ki i ot kol mot maber miyo gibedo ki kuc;

ento jo ma gin lujemo gibedo i lobo mutwo.

7Ai Lubanga, ikare ma itelo wi lwaki,

ikare ma iwoto kwedgi ki i dye tim, 81

ngom oyenge, kot bene oa ki i polo ocore i lobo,

got Cinai bene oyenge inyim Lubanga;

oyenge inyim Lubanga,

ma en Lubanga pa jo Icrael.

9Imiyo kot madwong ocwer i lobo, Ai Lubanga;

ci iroco loboni ma ool woko odoco.

10Lwaki gubedo iye macalo pacogi;

dok bene pi beri, Ai Lubanga,

ipito jo mapiny obwoyogi ki cam.

11Rwot omiyo cik,

dong mon mapol gukubu lok maber meno oweko onya kun giwaco ni,

12“Luker kacel ki monygi gitye karingo woko aringa!”

Mon ma gudong paco gupoko jami ma kiyako woko ikin gi.

13Kadi ma gibutu i dwol romi,

ginen calo akuri ma kideyo bwome ki ryal,

dok yece kideyo ki jabu ma obedo alumalum.

(Pingo jo mogo ikinwu obutu i dwol romo ikare me cito kalweny?)

14Ma Lubanga Matwero ducu oketo luker woko iwi got Jalmon,

ci omiyo pee bene ocwer kunu.

15Got Bacan kara tek kuman,

got ma lacol wiye pol,

en got me Bacan!

16Pingo wun jo ma bedo iwi got Bacan wuneno ki nyeko ikom

got ma Lubanga oyero me bedo iyeni?

Eyo, ento Rwot bibedo kunu gire matwal!

17Rwot oa ki i got Cinai bino i kabedone maleng,

en obino ki lwak gadigadi matego maromo alip ki alip. 182

Lubanga oito wa iwi got malo, kama Ot pa Lubanga tye iye

kun coko jo ma kimakogi i dog lweny cito kwedgi;

dok obedo kagamo mot ki bot dano,

kadi wa ki bot jo mayam gujemo woko.

Rwot Lubanga dong bibedo kunu.

19Kipak Rwot, pien nino ki nino

en tingowa wa ki pekowa ducu ikore;

Lubanga aye lalarwa.

20Lubangawa en Lubanga me lar;

en Rwot Lubangawa, ma larowa ki i to.

21Ento Lubanga bigoyo wi lukwore turu woko,

bigoyo wi dano ma yer wigi bocogu ma gilubu timgi me bal.

22Rwot owaco ni,

“Abidwoko lukworwu cen ki i Bacan;

abiwotogi woko kamaleng ki ite nam matut,

23wek wubin wulwok tyenwu ki remogi,

wek gwogiwu bene gunang remo pa lukworwu madwong macalo gimito.”

24Ai Lubanga, jo ducu gitye kaneno kit ma i dore kwede kacel ki lwaki,

dore pa Lubangana, Lakera, ma cito kwede i kabedone maleng.

25Luwer gutelo nyim, lugo wer gudong i ngec,

ka dong anyira ma gigoyo ajaa gubedo idyere.

26Onongo gubedo kawer ni, “Kipak Lubanga i coke madit pa lwake,

wupak Rwot, wun likwayo pa Icrael ducu!”

27Ma otelo yoo bino ca ni aye Benjamin, ma en kaka matidi loyo,

ka dok rwodi me Juda ki lwakgi madwong gulubu,

ka dong rwodi me Jabulon ki rwodi me Naputali i korgi.

28Nyut tweroni, Ai Lubanga;

nyut teki, en tek ma itiyo kwede pirwani.

29Pi odi matye i Jerucalem,

omiyo luker gikelo mot gityero boti.

30Juk Ejipt, ma en lee tim mager ma bedo ikin lagada,

ma en lwak twoni ki lutino dyangigi.

Nyon jo ma yenyo lim ajog woko piny ki tyeni,

ket lwak me rok ma cwinygi yom pi lwenygu woko ata.

31Wek kikel mola ki i Ejipt;

dok wek jo Etiopia gubin oyotoyot kun giilo cinggi malo ma guryeyo bot Lubanga ka gilego bote.

32Wuwer wer bot Lubanga, wun ker ducu ma iwi lobo;

wuwer wer me pak bot Rwot;

33Wuwer wer bot en matye kawot iwi polo,

en wi polo macon; winy, en tye kadange ki dwon mamor kiteko adada.

34Wutit pi twero pa Lubanga,

ma en ngat madit ma loce tye i Icrael,

ma twerone bene tye malo i polo.

35Lubanga me aura makelo lworo tye i kabedone maleng,

en Lubanga pa Icrael,

mamiyo twero ki tek bot jone.

Kipwo Lubanga!