Jabuli 67

Wer me miyo pwoc bot Lubanga

1Lubanga onyut ki wan kicane dok omii ki wan gum,

ci onenwa bene ki wang me kica,

2wek dano ma i lobo ducu gunge miti;

wek rok ducu onge lok me lari ki tweroni makelo lare bot jo ducu.

3Mii rok ducu ma iwi lobo gupaki, Ai Lubanga;

wek lwak me rok ducu gupaki!

4Wek lurok ducu cwinygi obed yom kun giwero wer me pwoc ki yomcwiny,

pien in aye ingolo kop pa rok ducu ikit mupore,

dok in aye ma itye katelo rok me wi lobo ducu.

5Mii rok ducu ma iwi lobo gupaki, Ai Lubanga;

wek lwak me rok ducu gupaki!

6Lobo dong oceko cam mabup;

Lubanga ma Lubangawa dong omiyowa gum.

7Lubanga dong omiyowa gum;

pimeno dano ducu ma i lobo myero guwore.