Jabuli 66

Wer me pak ki pwoc bot Lubanga

1Wun jo ducu ma wubedo iwi lobo,

wugo kijira bot Lubanga ki yomcwiny;

2wuwer wer me pak ki me deyo pi woro nyinge,

wupake ki pak me deyo madit adada!

3Wuwac bot Lubanga ni,

“Gin me aura ducu ma itiyo kelo lworo madit mada!

Tweroni giri dit adada,

miyo lumoneni ducu gimwole amwola inyimi.

4Dano ducu ma i lobo giworo in;

giwero wer me paki,

giwero wer ma gipako nyingi.”

5Wubin, wunen gin ma Lubanga otiyo.

En otiyo gin makelo lworo mada ikin dano. 61

En oloko nam odoko ngom mutwo;

omiyo dano guwoto ki tyen gi ki i dye kulu gukato loka tungcel,

ma omiyo wabedo ki yomcwiny pi gin ma en otiyo kunu.

7En loyo loc nakanaka ki tek me twerone,

dok ociko wange me neno rok ducu.

Jo ma gin lujemo myero pe guwake.

8Wupwo Lubanga, wun lwak me rok ducu,

wuwek dwon me pak ma wupake kwede owinye.

9En ma ogwokowa omiyo pud wakwo,

dok pe oweko kiloyowa kadi ki acel.

10In dong ityeko temowa, Ai Lubanga;

dong itemowa macalo ryal ma kiliyo imac.

11Ikelowa imiyo wamoko i obwo;

dok bene imiyowa yec mapek ni wating.

12Iweko lukworwa gingweco ginyono wiwa woko piny;

wawoto ki i dye mac wa i dye pii,

ento in dong ikelowa wao ikabedo ma opong ki jami mabeco.

13Abibino i odi kun akelo boti gityer me gitum awanga;

abicobo kwonga inyimi kun amiyi gin mayam acike pire.

14Abimiyo gin madong awaco kidoga ni abimini,

gin ma acike pire ikare ma onongo atye i can.

15Abityero boti gitum awanga me lee makwo ma gucwe,

dok abidunyu boti yito mac ma kiwango ki gitum me nyogi romi;

abityero boti twoni dyangi kacel ki dyegi.

16Wubin wuwiny, wun jo ducu ma wulworo Lubanga,

ci abitito botwu gin ma Lubanga otiyo pira.

17Ceng akok bote matek,

dok bene apake ki wer pi dworo nyinge.

18Ka nene aumu bala i cwinya,

kono Rwot pe owinyo kokona wa ki acel.

19Adada Lubanga dong owinyo kokona;

dong owinyo legana ducu.

20Kipwo Lubanga,

pien pe okwero winyo legana,

dok bene pe okwanyo mar mere ma pe loke woko ki ikoma.