Jabuli 65

Pak ki pwoc bot Lubanga

1Dano myero gupaki i Cion, Ai Lubanga;

dok myero gumini gin ducu mayam gukwongo pire,

2pien in aye ma igamo lega pa jo ducu.

Dano ducu gibia gibino boti ki i lobo weng.

3Ka balwa ma watimo dong obwoyowa,

in itimowa kica ci iweko balwa.

4Dano ma iyero ci ikwanyo ikelo cok boti tye ki gum,

me bedo idyekal meri i kabedoni maleng.

Wabiyeng ki jami ducu mabeco matye i odi,

ma en aye kabedoni maleng.

5Gam legawa, Ai Lubanga Lalarwa,

ilarowa kun itiyo jami madito me aura makelo lworo.

Jo ducu ma gibedo i lobo gigeno in,

kadi wa jo ma gibedo kama lobo ogik iye,

ki jo ma gibedo kamabor wa i agiki nam.

6In ma icibo godi ocung matek i kabedogi ki teki,

ma iruke woko ki tweroni madwong.

7In aye ma ijuku mor pa nam ki twage me biamwonyi bene;

dok ijuku woo pa lwak me rok ducu.

8Ma omiyo dano ducu ma gibedo kamabor iwang apoki me agiki lobo

gitye ki lworo pi lanyut ma itiyo;

dok imiyo lwak gigoyo kijira pi yomcwiny

cake tung kunyango o kwede wa i tung kupotoceng.

9I maro lobo omiyo kot cwer iye,

imiyo lobo oceko cam mabup;

kuluni ducu ma iketo pong woko ki pii;

in bene ma imiyo bel cek, pien in yam iyubu kumeno.

10Imiyo kot cwer bino i poti ma kipuru ki kweri dyang,

dok ipiro ngom mutinge ma idyere woko maber,

imiyo kot cwer iye madwong ci obido woko,

dok imiyo gum ikom kodi ducu ma i poto gitwi gidongo maber.

11Mwaka ki mwaka imiyo cam cek bot dano madwong pi gum ma imiyo;

kabedo ducu ma i wok ki iye pong ki lonyo.

12Olet ma i tim ducu lum lot mabup iye,

iweko wi cere ducu gibedo ki yomcwiny madwong.

13Olet ducu pong ki lwak romi mapol ma pe wace;

notagu ducu pong ki kal matye kadongo iye,

ma gigoyo kijira ma giwero wer kacel ki yomcwiny.