Jabuli 64

Lega pi gwok

1Winy dwona ma akok kwede boti, Ai Lubanga;

an atye ki can, lar kwona do ki i cing lukwora!

2Gwoka ki ikom lok pa jo maracu ma gipiro ikoma i mung,

konya ikom lwak lutim maracu.

3Gipako lebgi calo gipako pala lucwan,

ma giketo cwinygi iloko lok makec calo lak atero ma kicelo ki atum.

4Komgi mit kaboko lokgi me gobani kun gimiyo ngece oyotoyot dok lewic mo pe makogi wa ki acel;

wek gityek jo mabeco i yo me lworo ki keto lok roro ikomgi.

5Tamgi omoko liking ikom gin marac ma giparo ni omyero gitim;

nen gitye kalok keken gi pi ciko owicgi i mung,

kun giwaco ni, “Anga matwero nenowa?

6Anga kono matwero yenyo balwa wek enong?

Wabedo ki tam me ryeko omiyo wapiro lok ma pe wace.”

Dong gin matye itam ki i cwiny dano niang iye tek,

pien tye kamatut!

7Ento Lubanga bicelo aterone cito ikomgi;

ci gibilimo rete cutcut.

8En bityekogi woko matwal pi lokgi ma guloko;

ci dano ducu ma binenogi gibiyengo wigi.

9Bimiyo jo ducu gibedo ki lworo;

ci gibitito pi gin ma Lubanga otimo,

kun gitamo bene mot pi gin ma en otyeko tiyone.

10Wek jo ma kitgi atir gubed ki yomcwiny i Rwot,

dok guring gular bote,

wek jo ducu ma cwinygi atir gupake.