Jabuli 63

Kee me bedo cok ki Lubanga

1Ai Lubanga, in Lubangana, kee me bedo cok kwedi tye kaneka,

kwona ducu paro piri;

koma dong gomo piri atika,

calo i lobo mutwo, ma ool, ma gomo pii.

2Pimeno abedo kayenyi i kabedoni maleng,

pi neno tweroni kacel kideyoni.

3Pien mar meri ma pe loke ber kato kwo,

pimeno abipaki gira kare ducu.

4Abipwoyi pi kare me kwona ducu;

abikok boti kun atango cinga.

5Kwona biyeng calo acamo moo ma i cogo ki moo dwolo,

abiwero wer kun apaki ki yomcwiny madwong.

6Kadi ka atye iwi kitandana wiya po ikomi,

dok abedo kalwodo lok ikomi dyewor benebene;

7pien in ibedo lakonya ikare ducu,

dok akane i tipu te bwomi kun awero wer ki yomcwiny.

8Amoko ikomi woko liking,

ci igwoka woko maber ki cingi ma lacuc.

9Ento jo ma giyenya ma gimito neka

gibidonyo gicito piny ite ngom matut.

10Kibinekogi woko ilweny ki pala lucwan,

gibidoko cam pa too me tim.

11Ento rwot bibedo mere ki yomcwiny pi Lubanga;

jo ducu ma gikwongo kwong ki nying Lubanga gibipake;

ento jo ma lugoba kibiumu doggi woko lipuk.