Jabuli 53

Kit maracu pa dano

(Jab 14)

11

Dano ma laming waco ki i cwinye ni,

“Lubanga gire peke.”

Gin jo ma kitgi racu ma gitimo gin me kwer;

pe tye ngat mo ma tiyo gin maber.

2Lubanga neno dano ducu kun neno piny ki i polo,

me neno kace tye jo mogo ikin gi ma giryek,

ma giyenyo en.

3Gin ducu dong gungak woko, gudoko jo ma kitgi racu;

pe tye ngat mo ma tiyo gin maber, pe tye kadi ki acel.

4Gin lutim maracu ni, pe gitye ki ngec?

Giyako lim pa jona calo gicamo kwon,

ma pe bene gilwongo nying Lubanga.

5Gitye kunu ki lworo madwong

kit lworo mayam peya onen!

Lubanga biketo cogo pa jo ma pe gingeyo en woko ata;

lewic bimakogi, pien Lubanga dong okwerogi woko.

6Eyo, onongo alego ni lare pa jo Icrael omyero obin ki i Cion!

Ka Lubanga bidwoko gum bot jone.

Ci Yakobo bibedo ki yomcwiny madwong, ki Icrael bene cwinye bibedo yom.