Jabuli 52

Ngolo kop pa Lubanga ki kicane

1In twon oteka, pingo inyate pi gin marac ma itimo

ikom jo ma ngeyo Lubanga?

2Ipiro lok me tyeko jo mukene woko i dyeceng jwi.

Lebi tye mabit calo lyedi,

imaro loko lok me roro.

3Imaro timo gin marac makato timo gin maber,

dok imaro loko lok goba makato loko lok ada.

4Imaro miyo arem ikom dano ki lok maracu ma iloko,

in dano ma lagoba.

5Ento Lubanga binginyi woko piny matwal;

en bimaki ci ywayi woko ki ikemani;

ka dok en biputi woko ki i lobo pa jo makwo.

6Jo ma kitgi atir bineno ci gibedo ki lworo,

gibinyere bene kun giwaco ni,

7“Nen, man aye dano ma onongo pe mito ringo kalare bot Lubanga,

ento obedo kageno lwak lonyone ma dwongi,

dok ogeno ni lime aye kalarene!”

8Ento an abedo macalo yat jeituni ma jange olot ojany matye i Ot pa Lubanga.

Abedo ma ageno mar pa Lubanga ma pe loke nakanaka.

9Abipwoyo in nakanaka,

pien dong ityeko tiyo man.

Nyingi ber, abibedo katucune inyim joni ma gingeyi.