Jabuli 51:10

Lega me kwayo kica

1Ai Lubanga, tima kica

pi mar meri ma pe loke;

dok pi kicani madwong ci i jwa bala woko ducu.

2Lwok gin marac woko liweng ki ikoma,

dok ilonya ikom bala.

3Angeyo bala ducu maber,

dok kare ducu wiya po ikom bal ma atimo. 41

An dong atyeko timo bal ikomi, ikom in keken,

kun atimo gin manen marac i wangi;

pimeno lok ma iwaco ikoma tye atir,

dok kop ma ingolo ikoma tye kakare.

5Nen, abedo labalo cake ikare ma kinywala,

ikare ma maa ogama i ic onongo an dong atye ki bal.

6Nen, in imito ni dano obed ki ada i iye;

pimeno pwonya ki lok me ryeko wek odony matut i cwinya.

7Lonya ki anyero, nia ikom bala ci abibedo maleng;

lwoka ci abibedo matar makato pee.

8Miya abed ki yomcwiny madwong;

mi cwinya mayam ituruni dok obed ki yomcwiny bene.

9Mii wangi woko, pe inen roc mera,

dok i jwa bala woko ducu.

10Ai Lubanga, miya abed ki cwiny ma olony,

ket cwiny manyen ma pe loke obed i iya.

11Pe iryema woko ki inyimi,

dok pe ikwany Cwiny meri maleng woko ki bota.

12Lara, ci imii abed ki yomcwiny;

miya cwiny me lubu ciki.

13Ci abipwonyo lujemo me lubu yoni,

ki lubalo gibiloke gidwogo boti.

14Ai Lubanga, lara ki ikom jo ma gimito oyo remona,

in Lubanga ma lalara,

ci abiwero wer me paki ki dwon malongo pi kiti ma atir.

15Ai Rwot, yab doga,

ci abiwero wer me paki.

16Gitum ma dano kelo boti pe mini yomcwiny mo;

kadi bed atyer boti gitum awanga, in pe ibipwoyo.

17Gitum ma Lubanga pwoyo aye cwiny ma ongut.

Ai Lubanga, in pe ibicayo ngat ma cwinye cwer pi bale ki ma ngut.

18Tim ber ki Cion ma oporo leng cwinyi,

dok icwe cel me Jerucalem odoco.

19Ci dong cwinyi bibedo yom pi gitum ma atir,

pi gitum awanga ki gitum ma kiwango woko ducu ki bere;

ka dong kibityero twoni iwi keno tyeri.