Jabuli 33

Wer me pako Lubanga

1Wuwer matek ki yomcwiny i Rwot, wun jo ma kitwu atir!

Myero wupake, wun jo ducu ma cwinywu leng.

2Wumii pwoc bot Rwot kun wupake ki opuk,

wupake ki wer nanga ma tole tye apar.

3Wuwer wer manyen bote,

wugo nanga ki kit kwiriwu ducu kun wuwero ki dwonwu malongo.

4Lok pa Rwot tye ada,

dok tice ma en tiyo ducu gene.

5Rwot maro kit ma atir ki ngolo kop atir;

lobo opong ki mar mere ma pe loke.

6Rwot ocweyo polo ki loke,

ka ocweyo ceng, dwe ki lakalatwe ki lok ma en oloko ki doge.

7En oguru pii me nam woko ducu kacel,

i kabedo acel calo opiko i opoko;

ka okano nam madongo bene i kicika odine me kano jami.

8Wek lobo ducu omii woro bot Rwot,

wek jo ducu ma gibedo i lobo gulwore.

9Ikare ma en oloko, ci lobo obedo tye;

gin ma en ociko otiine, dok ocung matek liking.

10Rwot gengo yub pa lurok ma pe giwore wek pe ocobe,

dok gengo yub me tim maracu pa lwak me rok mapol wek pe guket i tic.

11Yub pa Rwot bedo matwal;

yub ducu ma en tamo ki i cwinye bedo matwal ikare pa yalwak ducu.

12Lwak me rok ma Rwot aye Lubangagi tye ki gum,

gin aye jo ma en oyero me bedo jone kikome!

13Rwot neno piny ki i polo;

en neno dano ducu.

14En lworo piny ki wange ki iwi komker kama obedo iye,

dok neno jo ducu ma gibedo i lobo.

15En aye ma oketo cwinygi ducu,

dok en neno gin ducu ma gitiyo.

16Kit rwot mo keken pe twero loyo lweny pi dul mony matek ma en tye kwede;

lalweny bene pe twero loyo lweny pi tekom madit ma en tye kwede.

17Pe kitwero geno aguragura me lweny ni romo miyo loc;

tekeni ducu pe twero laro dano.

18Nen, Rwot neno jo ma giwore,

gin jo ma gigeno mar mere ma pe loke,

19wek olargi ki i to,

dok ogwokgi gubed makwo ikare me kec.

20Genwa ducu tye ikom Rwot

en lakonywa, dok en kwot ma gwokowa.

21Eyo, wabedo ki yomcwiny pi en,

pien wageno nyinge maleng.

22Ai Rwot, wek mar meri ma pe loke obed ikomwa,

kit macalo wageno in.