Jabuli 32

Tucu bal ki timo kica

11

Dano ma dong kiweko bale tye kigum,

ma bale dong kikwanyo woko.

2Dano ma Rwot pe dong kwano bal mo i wiye tye ki yomcwiny,

ma pe tye ki bwola mo i cwinye.

3Ikare ma akwero tucu bala, anongo ni koma obale woko

pi cur ma abedo kacur dyeceng jwi.

4Pien imiya pwod malit i dyeceng ki i dyewor;

tekona ducu otwo woko macalo toyo two woko ki lyeto me oro.

5Cut atucu bala boti,

pe amungu gin marac ducu ma onongo atimo;

awaco ni, “Abitucu bala ducu bot Rwot”;

ci in bene iweko bala ducu.

6Pimeno wek jo ducu ma gigeni gukel legagi boti;

ikare ma nongo can mito mwonyogi woko calo lalele me pii madwong,

pii meno pe bio ikomgi.

7In aye kakanena,

igwoka ki i ayelayela;

abiwer ki dwon malongo,

pien igura woko dyere ki lari.

8Rwot owaco ni, “Abipwonyi dok abicimi yo ma myero ilubi;

abimiyi ryeko dok abineni ki wang me mar.

9Pe ibed calo aguragura nyo kana ma pe niang,

ma myero kitwe doge ki wiye,

wek olub gin ma kiwaco.”

10Jo maracu gibilimo arem madwong;

ento jo ma gigeno Rwot en gwokogi ki mar mere ma pe loke.

11Wubed ki yomcwiny madwong i Rwot,

wun jo ma kitwu atir, wudange pi yomcwiny,

wun jo ducu ma cwinywu atir!