Jabuli 31

Lega me gen ikom Lubanga

1Ai Rwot, aringo alaro boti wek igwoka;

pe iwek kiket lewic iwiya.

In Lubanga ma kiti atir, alegi lara do!

2Cik iti, iwiny legana, lara oyotoyot!

Bed got ma aringo alaro iye,

dok ibed cel gogona matek ma laro an.

3Eyo, in aye i gota ki cel gogona;

tela dok igwoka pi nyingi.

4Gonya woko ki i obwo ma kiciko kikano pira,

in aye kalarena. 51

Amiyo kwona dong i cingi;

Ai Rwot, in dong ityeko koka, in Lubanga me ada.

6In idag jo ma giworo lubanga ma pe ada;

ento an ageno mera Rwot.

7Abibedo ki yomcwiny madwong pi mar meri ma pe loke,

pien dong ityeko neno can ma omaka,

dok ityeko winyo koko me can ma odiya.

8Pe imiyo lukwora gumaka;

imiyo alanyo lukwora woko.

9Ai Rwot, kica omaki ikoma do, pien atye i can;

wanga dong olwal woko pi koko madwong,

koma ducu dong oloc woko marac.

10I kwona ducu abedo ki cwercwiny,

dok mwaka me bedona opong ki cur keken.

Tekona otum woko pi ayelayela ma atye kwede,

cogona ducu gubale woko.

11Lumonena ducu gingala angala,

ki luwota bene gicaya acaya;

jo ma gingeya dong gilwora alwora,

ka ginena i gudu ci giringo woko ki bota.

12Luwota dong wigi owil woko ikoma calo dong onongo ato woko atoya;

aloke adoko calo otako agulu ma oto.

13Eyo, awinyo jo mapol gikwoto nyinga;

omiyo lworo bene ogura woko dyere!

Guribe gitye kayubu lok ikoma,

ma gipiro lok me neka woko.

14Ento gena pud tye ikomi, Ai Rwot,

kun awaco ni, “In Lubangana.”

15Kare me kwona tye i cingi;

lara ki bot lukwora, ki i cing jo

ma giketo ayela ikoma.

16An latici, nena ki wang me kica;

lara pi mar meri ma pe loke!

17Akok boti, Ai Rwot, pe iwek lewic omaka;

wek lewic omak jo maracu,

wek guto gucit i lobo pa jo ma oto ci gubed mot laling.

18Juk gin jo ma loko lok goba ni woko,

ma giloko lok maracu ikom jo ma kitgi atir

ki wake kacel ki cac.

19Beri dit rom kwene,

ma igwoko pi jo ma gilwori!

Gin ma itiyo bedo me aura rom kwene iwang ngat acel acel,

ma itiyo pi jo ma giringo gilaro boti!

20Igwokogi woko maber i kabedo ma itye iye,

igwokogi bene ki i piro lok ma dano gipiro;

ikanogi woko ma gibedo mot ki kuc

i odi ki i yet pa lukworgi.

21Kipwo Rwot,

pien dong otyeko nyutu mare bota i yo me aura,

kama onongo kigura woko dyere macalo gang ma kirumu.

22Ikare ma adongo oduru awaco ni,

“Dong giryema woko ki inyimi kamabor.”

Ento in iwinyo lega me bako doga,

ikare ma akok boti pi kony.

23Wumar Rwot, wun lwake ducu ma gene!

Rwot gwoko jo ma lugen,

ento pwodo jo ma gilyere ma giwake awaka.

24Wubed tek, dok wubed ma cwinywu nwang,

wun jo ma wuketo genwu ikom Rwot!