Jabuli 30

Lega me pwoc

1Abipaki, ai Rwot, pien dong ilara woko ki bur matut,

dok pe imiyo lukwora gubedo ki yomcwiny pira.

2Ai Rwot Lubangana, onongo akok boti ni ikonya,

ci in dong ityeko canga woko.

3Ai Rwot, in aye ma ilara ikwanya woko ki i lobo pa jo ma oto,

iroco kwona odoko nyen ki ikin jo ma gudonyo piny i lyel.

4Wuwer wer me pako Rwot wun jone ma gene,

dok wumiye pwoc pi nyinge maleng.

5Kinigane pe rii, bedo pi kare manok keken,

ento bere bedo pi kare me kwowa kulu.

Koko twero bedo i dyewor,

ento yomcwiny bino i odiko.

6Dong an ikare ma atye ki lonyo awaco ni,

“Dong pe kibidira woko cen.”

7Pi beri bota, Ai Rwot,

omiyo iciba acung liking macalo got matek.

Ento ikare ma ikane woko ki bota,

abedo ki lworo madwong.

8Akok boti, Ai Rwot,

dok alego lega me bako dog bot Rwot kun awaco ni,

9“Kit kony ango ma tona twero miyo boti

ka adonyo piny i bur?

Apwa me ngom mono bipaki? Dok binyutu beri ki adani?

10Ai Rwot, winy kokona, wek kica omaki ikoma!

Ai Rwot, bed lakonya!”

11Ityeko loko kumu ma atye kwede odoko myel me yomcwiny madwong;

igonyo bene bongo colana woko ka dong iruka ki yomcwiny.

12Pimeno pe abibedo laling; abiwero wer me paki.

Ai Rwot Lubangana, abimiyi pwoc nakanaka.