Jabuli 21

Pak pi lar ki i cing lukwor

1Laker tye ki yomcwiny, Ai Rwot, pien in aye imiye tek;

dok opong ki yomcwiny madwong pi loc ma imiye.

2Ityeko miye gin ma cwinye mito,

dok igamo doge imiye gin ma en olegi pire.

3Ijole ki mot mabeco me gum;

iketo bene lalukana me jabu ma kiliyo maber i wiye.

4En olegi ni imiye kwo, ci imiye;

imiye kwo ma rii nakanaka pi kare malac.

5Deyone dit pi kony ma imiyo bote;

imiye deyo ki dit me loc.

6Eyo, imiyo ki en gum mabedo ikome matwal;

bedoni kwede miye yomcwiny.

7Laker geno Rwot;

pimeno pe kibidire cen,

pi mar ma pe loke pa Ngat Mamalo Twal.

8Ibicwalo cingi imako lukwori woko ducu;

ibimako jo ducu ma gidagi ki cingi ma lacuc.

9Ka ibinen botgi,

ci ibilokogi woko i ruk-mac.

Rwot bimwonyogi woko ki kinigane,

ci mac biwangogi woko.

10Ibineko lutinogi ityeko woko liweng ki i lobo,

ibineko likwayogi woko ducu.

11Gipiro lok ikomi kun giyubu me timi marac,

ento kadi gibed ki yub me timo gin marac, yubgi pe bicobe kakare.

12Ibitelo atumi ibayo atero kun imito icel wanggi woko;

miyo gin ducu giringo woko.

13Dong kidwori pi teki, Ai Rwot!

Dok wabiwero wer kun wapako tweroni.