Acoli Bible Revision
Jabuli 20
Lega pi loyo lweny
Rwot myero ogam dogi inino ma itye ki can!
Lubanga pa Yakobo myero okonyi!
En myero ocwal kony boti ki i kabedone maleng,
okony kori ki i Cion!
En myero ogam mot ducu ma ityero bote,
dok opwo gitum awangani ducu ma itumu bote.
En myero omiyi gin ma cwinyi mito,
dok omii yub meri ducu ocobe kakare.
Wek wawer wer me pak ki yomcwiny pi loci;
wek wail benderawa malo i nying Lubangawa!
Rwot omiyi gin ducu ma ilego ki bote!
Kombedi dong angeyo ni Rwot bikonyo laker ma mere ma kiwiro.
En bigamo doge ki i polone maleng, dok bimiye loyo lweny.
Jo mogo ginyate pi gadigadi lweny, ki pi aguragura;
ento wan wanyate pi nying Rwot Lubangawa.
Gibiyoke ci gipoto woko piny;
ento wan wabia malo wacung atir.
Mii loc bot laker meri, Ai Rwot;
gam dogwa ka wakok boti.
Acoli Bible Revision. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.