Jabuli 19

Deyo pa Lubanga i ginacweya

1Polo ki jami ducu matye iye ginyutu deyo pa Lubanga;

dan polo bene tito pi tic me cinge.

2Nino acel acel tucu pire bot nino malube,

dyewor acel acel bene nwoyo titone bot dyewor mukene wek onge.

3Pe giloko, ki lokgi mo bene peke;

dwon gi mo pe winye. 41

Ento dwon gi winye teretere iwi lobo ducu,

ki lok ma giloko winye wa i agiki piny.

Lubanga oguru kema i polo pi ceng,

5ma bino macalo lanyom ma a woko ki i kicikane,

macalo laco ma kome tek ma ringo ngwec ki yomcwiny.

6Tuc ki i acaki polo tungcel,

woto rumu woko ducu wa i agikine;

gin mo peke liweng matwero kane ki ilyetone.

Cik pa Rwot

7Cik pa Rwot ber, dok tye atir;

miyo keru me kwo manyen bot dano;

gin ma Rwot ociko tye me ada,

miyo ryeko bot jo ma gipeke ki ryeko.

8Cik pa Rwot tye atir,

yomo cwiny dano;

gin ducu ma Rwot ociko tye maleng,

miyo dano niang maber.

9Lworo Rwot ber,

dok pe bigik matwal,

ngolo kop pa Rwot tye kakare,

dok bedo atir kare ducu.

10Pirgi tek ma myero kimak makato jabu,

kato bene jabu ma kiliyo maber.

Lim kato moo kic woko,

kato bene wa moo kic ma cwer ki i peda kic.

11Gimiyo ngec bot an latici;

an ngat ma gwoko ciki alimo mot madit.

12Anga matwero neno bale kene?

Lara ki ikom bala ducu mukane.

13Juka bene wek pe apot i bal mo ma obino pi cwiny me wake;

pe iwek oloya!

Ci abibedo labongo bal mo ikoma,

abibedo ma pe atimo bal mo.

14Mii lok ma a ki idoga ki tam ducu matye i cwinya

obed ma in ipwoyo,

Ai Rwot, in aye gota dok lalara.