Jabuli 18

Wer me wayu pa Daudi

(2 Cam 22:1-51)

1Amari, Ai Rwot!

Pien in i teka.

2Rwot aye gota en cel gogona matek, en lalara.

En Lubangana, ki gota, aringo alaro bote;

en gwoka macalo kwot, en kalarena matek,

en gengo ngeya woko ci gwoka miyo abedo maber labongo ayela.

3Akok bot Rwot,

ci en olara ki i cing lukwora, pimeno myero kipak Rwot.

4To otelo tole ci otweya woko adunu,

biamwonyi me to otwage oruma woko dyere,

kulu ma piine, ger ma neko dano ocore woko iwiya limuk.

5Tol me to odwala woko,

owic me to bene orine woko inyima.

6Ikare ma atye i can akok bot Rwot;

akok gira bot Lubanga pi kony.

En owinyo dwona ki i ot mere maleng,

kokona pi kony odonyo i ite.

7Cutcut lobo oyenge ma more pe twere,

te godi bene ducu guyenge woko ma giyenge matek,

pien kiniga onongo omako Lubanga.

8Yito oduny okati ki i ume,

mac ma wang malyet ki lodine okati ki idoge.

9En oywayo polo odwoko cen, ci olor obino piny,

kun piny macol mapek oryene ite tyene.

10Oito iwi lakerubi ci otuk kwede,

oringo madwir i dye yamo.

11Oketo piny macol orume dyere,

kemane obedo pol mapek mupong ki pii.

12Pee ki lodi mac ma lyel

gunen i piny maryeny maleng ki inyime,

otucu dye pol macol licuc woko.

13Rwot omiyo polo omor,

dwon Ngat Mamalo Twal owinye,

ocwalo pee ki lodi mac.

14En obayo aterone, okeyo lumerok woko;

omiyo lutkot owil, ci orwadogi woko piny.

15Dye nam opoke, tere onen,

guti me te lobo bene odong twolo,

ikare ma ijukugi, Ai Rwot,

ikare ma ikutugi ki yweyo ma okati ki i umi.

16Rwot ocwalo cinge piny ki i polo, ci omaka,

oywaya okela woko ki i pii matut.

17Ci en olara ki i cing lukwora matek,

en olara ki i cing jo ma gidaga,

pien onongo gitek mada giloya woko.

18Gupoto ikoma ikare ma can obwoya matek,

ento Rwot aye obedo kakonya.

19En okwanya woko ki i peko ma odiya;

en olara pien onongo ayomo cwinye.

20Rwot omiya pwoc pien oneno ni kita atir,

omiya gum muporo leng cwinya.

21En otima kitmeno pien abedo kalubu cik pa Rwot,

pe apoke woko ki bot Lubanga pi bal mo.

22Alubu cike ducu,

pe angak aweko gin ma en ociko.

23Pe atimo bal mo inyime,

dok agwoke mada pe atimo bal alii mo.

24Ma omiyo Rwot omiya pwoc pien oneno ni kita atir,

en omiya gum ma oporo leng cwinya ma abedo kwede inyime.

25Rwot, in lagen bot jo ma lugen;

bot ngat maber ma pe ki bal inyute bote bene calo ngat maber ma pe ki bal.

26Cwinyi leng ikom jo ma cwinygi leng,

ento iger ikom dano ma tame ogom.

27Ilaro jo ma mwole ken gi,

ento jo ma luwake idwokogi woko piny.

28Eyo, in aye ma icwinyo mac tarana;

Rwot Lubangana aye menyo colpinya.

29Eyo, atwero tyeko buca mony kulu ka ikonya;

pi teko pa Lubangana miyo apye akalo wi cel.

30Lubanga man, gin ducu ma en tiyo tye atir,

lok pa Rwot ma en cike me tiyo bedo ada;

en tye macalo kwot pa jo ducu ma giringo gilaro bote.

31Anga ma Lubanga, kono Rwot kene?

Anga ma got, pe Lubangawa aye keken gire?

32En aye Lubanga ma oruka ki tek,

en aye ma omiyo awoto ki kuc. 331

En oketo tyena obedo macalo tyen til,

ociba malo kama acung iye matek.

34En pwonyo cinga pi lweny,

ma omiyo atwero bayo wa atum mola.

35Dong ityeko miya kwot me lari,

kun ijola ki cingi ma lacuc;

kony ma in imiya omiya adoko dit.

36Imiyo aringo ayomo jo ma giryema ma gimito maka,

dok bene tyena pe ocer.

37Aryemo kor lukwora ci amakogi woko i yoo;

pe aloke adok cen nio, ka atyekogi ducu.

38Acobogi woko pil ci gupoto piny katyena;

ma pe dong gutwero a malo.

39In aye iruka ki tek pi lweny;

imiyo lulweny ikoma guto gutum woko katyena.

40Imiyo lumeroka gungweco woko ki bota,

imiyo atyeko jo ma gidaga woko.

41Gukok pi kony, ento ngat mo pe ma olarogi,

gukok bot Rwot, ento en pe ogamo doggi.

42Adinogi woko gudoko macalo apwa ma yot mayamo kolo;

anyonogi macalo coto matye i yoo gudo.

43In yam ilara ki ikom rok mapol ma gilwenyo kweda;

iketa abedo ladit maloyo rok ducu;

jo mayam pe angeyogi gudoko jo ma an aye aloyogi.

44Cutcut ka lurok guwinyo pira ci gubino bota ma gimwole amwola,

ci lurok gubino kun giryebe piny inyima.

45Tekcwiny orwenyo woko ki botgi,

gua ki kama gukane iye gubino ma komgi myel amyela.

46Rwot tye kwo! Kipwoye pien en gota!

Kipil wi Lubanga ma en lalara.

47En Lubanga ma omiya aculu kwor ikom lukwora,

dok ma obwoyo rok mapol, omiyo gubedo ite loca;

48ci olara ki i cing lumeroka.

Eyo, ipilo wiya makato lukwora, ilara ki i cing lulweny ma lubwami. 492

Pimeno abikori ikin lurok, Ai Rwot,

dok abiwero wer me pako nyingi.

50Lubanga miyo deyo me loc madit bot rwote,

dok nyutu mar mere ma pe loke ikom danone ma en oyero ka kiwiro,

bot Daudi ki likwaye ducu matwal.