Jabuli 17

Lega pa ngat ma cwinye leng

1Ai Rwot, winy kokona pien loka tye atir;

cik iti iwiny kokona!

Winy legana,

pien pe tye lok me bwola mo ma a ki idoga.

2Ibimiyo aloyo kop,

pien ingeyo kop matye atir.

3Ka ingiyo cwinya, dok ka ilima i dyewor,

kadi bed itema, pe ibinongo gin marac mo ka tye i iya;

dok pe abalo ilok ducu ma aloko.

4Dok ka ingiyo tic pa dano,

ibinongo ni alubu ciki,

pe alubu kit pa jo ma gin lubwami.

5Kare ducu abedo kalubu yoni,

ma pe angak woko ki iye.

6Alegi kun akok boti, Ai Lubanga, pien ibigamo doga;

cik iti bota, iwiny lok ma aloko.

7Nyut mar meri ma pe loke i yo me aura,

in lalar pa jo ma giyenyo kalare i cingi tung lacuc,

pien igwokogi woko maber ki ikom lukworgi.

8Gwoka macalo igwoko tong wangi kikome;

kana ite tipu me bwomi,

9ki ikom jo maracu ma giyako lima,

gin lukwora ma giracu tutwali ma giruma woko dyere.

10Cwinygi dong odoko tek ma kica mo pe makogi;

dok lok ma giloko bene giloko ki nyate.

11Gilubu kora; kombedi guruma woko;

guciko wanggi me nongo kare ma myero gireta kwede woko piny i ngom.

12Lukwora calo labwor ma owor, gimito kido koma woko,

ma giliba kun gikura calo labwor i kabedo kama gukane iye.

13A malo, Ai Rwot, wek icit irwate ki lukwora,

lweny kwedgi ci iloogi woko!

Lara ki i cing jo maracu ki pala lucwani;

14lara ki i cinggi ki tweroni,

Ai Rwot, ki i cing jo ducu ma dong gitye ki jami ducu ma igi mito i kwo man.

Wek guyeng ki gin mayam ikano pirgi;

mi lutinogi bene gunong can ma oromo ki makato;

ci dok bene myero guwek can mogo odong pi lutinogi ma pud lukere.

15Kit macalo an kita tye atiri, abineni,

bedoni kweda miyo aco ki iwang nino ma nongo apong ki yomcwiny.