Jabuli 148

Kilwongo ginacweya ducu me pako Rwot

1Wupak Rwot!

Wupak Rwot ki i polo,

ki wun jo ma wubedo malo kamabor bene wupake!

2Wun lumalaikane ducu, wupake;

ki wun dul monye bene wupake!

3Wun ceng ki dwe wupake,

wun lakalatwe maryeny, wupake!

4Wupake, wun polo matye malo tutwal,

ki wun pii ma wutye malo iwi polo bene wupake!

5Wek jami ducu gupak nying Rwot!

Pien en ociko acika keken ci kicweyogi.

6En oketogi i kabedogi kikome wek gubedo iye matwal,

en oketo cik ma pe kitwero turune.

7Wupak Rwot ki i lobo,

wun min kulu madongo matye i nam,

kacel ki kut madongo me nam!

8Wun mac ki pee, toyo ki ngico,

ki yamo lapiru ma kodo matek pi cobo gin ma en ociko!

9Wupake, wun godi ki ceregu,

wun yadi ma nyak ki yadi cedar ducu!

10Lee tim ki dyangi ducu,

gin makwo ma lak alaka i ngom ki winyo ducu ma tuk!

11Wupake, wun luker me lobo kacel ki lwak me rok ducu,

rwodi ki luloc ducu me lobo!

12Awobe ki anyira kacel,

jo ma otii ki lutino bene!

13Wek gupak nying Rwot,

pien nyinge keken aye dit makato ducu;

deyone bene kato polo ki lobo woko.

14En omiyo lwake odoko tek,

ci omiyo jone ducu gipake,

gin jo Icrael ma pirgi tek mada bote.

Wupak Rwot!