Jabuli 147

Wer me pako Lubanga Matwero ducu

1Wupak Rwot!

Wero wer me pako Lubangawa ber,

pien en lakica, mumiyo wer me pak myero kwede.

2Rwot tye ka roco Jerucalem odoco;

en coko jo Icrael mayam kiterogi i opii kelogi paco.

3En cango jo ma cwinygi cwer,

dok tweyo wang retgi woko.

4En omoko wel lakalatwe woko ducu,

dok ocako nyinggi woko ducu liweng.

5Rwotwa dit, dok tek tutwal; tye ki niang matut ma pe pime.

6Rwot tingo jo ma kinyonogi piny, iloogi malo,

ci reto jo maracu gipoto woko ducu i ngom.

7Wuwer wer bot Rwot kun wumiye pwoc;

wupak Lubangawa ki opuk agoya.

8En umu polo woko ki pol,

dok miyo kot cwer i lobo;

en miyo lum dongo wa iwi godigu.

9En miyo cam bot lee tim,

dok pito lutino agak matye kakoko.

10Tek pa aguragura pe miye yomcwiny,

ki dwiro pa langwec bene pe yomo cwinye;

11ento Rwot cwinye yom ikom jo ma gilwore,

ki ikom jo ma geno mar mere ma pe loke.

12Pak Rwot, in Jerucalem!

Pak Lubangani, in Cion!

13En aye ma gwoko dog gangi cung matek;

en bene ma miyo gum ikom lutinoni.

14En miyo wang apoki loboni bedo ki kuc,

dok pitowu ki ngano maber adada ci wuyeng.

15En cwalo cike bot lobo;

ci kitiyo kwede oyotoyot.

16En cwalo pee mayom calo yer romo;

dok keto bwoyo pee woko atata calo buru.

17En bolo pee piny calo nginyinginyi cam ma poto i ngom;

anga matwero cung i ngico ma en miyo?

18En dok cwalo loke, ci lenyo pee woko;

en miyo yamone kodo, ci pii bene mol.

19En otito loke bot Yakobo;

cike ki gin ducu ma en ociko en otito bot jo Icrael.

20En pe obedo katic ki rok mo mukene kitmeno;

pe gingeyo cike ki gin ma en ociko ducu.

Wupak Rwot!