Jabuli 144

Lega pa rwot pi loyo lweny

1Kipwo Rwot ma en aye gota,

ma opwonyo cinga pi lweny.

2En gota ki cel gogona matek,

en kakanena ki lalara,

en gwoka macalo kwot, aringo alaro bote,

en ma obwoyo rok mapol, omiyo gubedo ite loca. 31

Ai Rwot, dano gin ango mamiyo ipo pire?

Dano adana ma mwani pingo ibedo ka tamo pire?

4Dano obedo calo yamo me yweyo keken,

nino me kwone bene obedo calo tipu yat makato woko oyotoyot.

5Ai Rwot, ywa polo idwok cen, ci ilor ibin piny!

Gud kom godi ci wek guduny yito!

6Mii lutkot owil omeny piny wek oket lukwori woko ata,

celgi ki ateroni ci wek guket woko ki ngwec ata.

7Rye cingi piny ki i polo,

ywaya ci ikwanya woko ki i pii matut,

lara ki i cing lurok,

8ma gibedo kaloko lok goba keken.

Kadi bed gutingo cinggi me kwongo kwong,

ento pud inongo ni giloko lok goba.

9Abiwero wer manyen boti, Ai Rwot;

abigoyo nanga ma kiciko ki tol puc apar kun apaki kwede.

10In aye ma imiyo loc bot luker,

dok ilaro latici Daudi.

11Lara ki i lak pala lucwan mager,

dok ilara ki i cing lurok

ma giloko meggi lok goba kekeni;

kadi bed gutingo cinggi me kwongo kwong,

ento pud inongo ni giloko lok goba.

12Mii lutino awobewa, ikare me bulugi

gubed calo ginapita ma dong otyeko dongo woko;

ki anyirawa bene gubed macalo wir me twoke

ma kitongo me gero gangkal madit.

13Mii derowa ducu gupong woko libic

ki kit wit cam mapatpat.

Mii romiwa bene gunywal lutinogi alip ki alip

ki dok alip apar i oletwa.

14Mii dyangiwa bene ma guduru gunywal lutinogi.

Pe imii koko me can mo owinye i dye gang kalwa.

15Gitye ki yomcwiny jo ma kit gum man bipoto ikomgi!

Gitye ki gum jo ma Lubangagi aye Rwot!