Jabuli 143

Lega pi kony

1Ai Rwot, winy legana;

winy legana me bako dog ma akelo inyimi!

Gam doga pien in ipore! 21

Pe ingol kop ikom latici,

pien pe tye dano mo makwo ma kite atir inyimi.

3Lakwora oryemo kora,

ci oloya woko adada,

omiyo abedo i colpiny calo jo mayam dong guto wacon.

4Pimeno cwinya dong ool woko,

gen bene dong orwenyo woko ki cwinya bene oari woko.

5Apo ikom kare macon ma dong okato,

ci abedo kalwodo lok ikom gin ducu ma dong itiyo;

gin ducu ma itiyo bino i tama.

6Aryeyo cinga atango boti ka alego,

cwinya mito neni calo lobo ma otwo woko ma mito pii.

7Ai Rwot, gam doga oyotoyot!

Cwinya mito ari woko!

Pe ikane woko ki bota,

miyo abedo rom ki jo ma gicito gidonyo piny i bur lyel.

8Ageno in mada;

wek awinyi i odiko kun ipoyo wiya ikom mar meri ma pe loke.

Pwonya ki yo ma imito ni myero alubi,

pien legana ducu acwalo malo boti kunu.

9Ai Rwot, lara ki i cing lukwora!

An dong aringo kalare boti.

10Pwonya wek atii gin ma imito, pien in Lubangana.

Wek Cwiny meri maberi otela i yo ma opire maromrom!

11Lara, Ai Rwot, pi deyo me nyingi;

dok ikwanya woko ki i can pi poreni!

12Pi mar meri ma pe loke pira,

dong inek lukwora ityekgi woko,

pien an abedo latici.