Jabuli 142

Lega pi kony ki i can

1Akok bot Rwot pi kony,

kun abako doga bene bote.

2Akelo lok me kokona ducu inyime,

dok atite bene kit can ducu ma atye ka nongone.

3Ka cwinya dong oari woko,

in ingeyo gin ma myero atim.

I yoo ma awoto ki iye kare ducu,

lukwora guciko owic woko pira.

4Ka aloko wanga tung acuc,

ci anongo ni pe tye dano mo ma myero okonya;

kalare mo mudong pira bene peke,

pe tye ngat mo ma paro pira.

5Ai Rwot, akok boti pi kony;

Rwot, in aye kalarena,

in aye dul ma kipoka i lobo pa jo makwo.

6Winy kokona do,

pien piny dong obwoya woko!

Lara ki i cing jo ma gitye ka liba,

pien gitek giloya woko.

7Gonya woko ki i buc,

wek amii pwoc boti.

Jo ma kitgi atir gibiruma dyere,

pien dong itiyo kweda i yo maber atika.