Jabuli 141

Lega pi gwok ikom gin marac

1Ai Rwot, akok boti, bin bota oyotoyot do!

Winy dwona ka akok boti! 21

Wek legana obed inyimi macalo odok eceta ma kiwango;

ki cinga ma atango botini myero obed calo gitum ma kityero boti i otyeno.

3Ai Rwot, konya i gwok doga,

wek pe angam doga kaloko gin ma pe opore.

4Gwoka wek pe abed ki cwiny me timo gin mo marac,

wek pe aribe ki jo maracu pi timo bal,

wek bene pe aribe kwedgi kacamo cam mamit ma gin yubu!

5Wek dano ma kite ber aye opwoda,

dano ma gene aye ojuka,

ento pe iwek dano mo marac owir wiya ki moo;

pien legana ma atye ka legi kwede teretereni

tye pi dago gin marac ma gin gitimo.

6Ka inen lutelagi kibologi woko piny ki iwi got,

ci dano gibiye ni lok pa Rwot kara tye ada.

7Macalo got ma kityero kinginyo iwi lobo,

kitmeno cogogi bene kibiketo woko atata ma pe kiyikogi.

8Ento an, Ai Rwot, wanga kemo boti;

ayenyo kalare boti, pe iweka ata ma pe igwoka!

9Gwoka wek pe amok i owic ma guciko pirani,

gwoka pe amok i obwo pa lutim maracu.

10Wek jo maracu gumok i obwogi keken gi,

ento mi an abwot ma pe gin mo oguda.