Jabuli 145

Wer me Pak

1Abidwori ki wer, in Lubangana ki Rwota,

dok abipako nyingi nakanaka.

2Abipwoyi nino ducu,

dok abipako nyingi nakanaka.

3Rwot dit, myero kipake tutwal,

dite pe romo tite, tere bene pe tate.

4Lwak me kare ducu gibipako tici bot lutinogi;

gibitito pi tic matego mayam itiyogi.

5Dok abilwodo lok ikom deyo me dit me keri,

ki ikom tic me aura mayam itiyo.

6Dano gibilok ikom tek me tici makelo lworo bot jo ducu,

ki an bene abitito pi diti.

7Kibimiyo pi beri madwong ywek ngene mada ikin dano,

dok kibiwero wer ki dwon malongo pi poreni.

8Rwot lakica dok maro dano,

kiniga pe mako oyot, mar mere ma pe loke dwong.

9Rwot ber bot dano ducu,

dok kica make ikom gin ducu ma en ocweyo.

10Ai Rwot, jami ducu ma in icweyo gibimiyi pwoc,

ki joni ma genene ducu gibipaki.

11Gibiloko ikom deyo me keri,

dok gibitito pi tweroni bene,

12wek dano ducu gunge pi tic matego ma in dong itiyo,

kideyo me dit me keri.

13Keri en ker ma rii nakanaka,

dok loci birii nakanaka ikare pa yalwak ducu.

Rwot lagen iloke ducu ma en ociko,

dok bene lakica i tice ducu ma en tiyo.

14Rwot kwako dano ma mito poto,

dok ilo jo ma piny obwoyogi woko ada malo.

15Wang ducu neno boti,

in aye ma imiyogi cam ikare ma mite kikome.

16In iyabo cingi,

ci imiyo gin makwo ducu giyeng.

17Gin ducu ma Rwot tiyo tye atir,

gin ma en timo ducu tiyo ki mar.

18Rwot tye cok bot jo ducu ma kok bote,

ma gikok bote ki ada.

19En miyo jami ducu ma mite bot jo ma lwore,

dok winyo kokogi, ci larogi bene.

20Rwot gwoko jo ducu ma mare;

ento jo maracu ducu en binekogi tyekogi woko.

21Abipako Rwot kare ducu;

wek gin makwo ducu matye ki kom gupak nying Rwot nakanaka.