Jabuli 138

Lega me pwoc bot Rwot

1Apwoyi ki cwinya ducu, Ai Rwot;

awero wer me paki inyim lubangagu.

2Aryebe piny akemo Ot meri maleng,

apako nyingi pi mar meri ma pe loke ki pi geneni;

pien itingo nyingi ki loki ducu malo makato jami mukene ducu.

3Inino ma akok boti, in igamo doga,

ci imedo tekcwiny bota.

4Luker ducu ma iwi lobo gibipaki, Ai Rwot,

pien dong guwinyo loki ma icike kwede.

5Gin biwero wer pi gin ma in Rwot itiyo,

ki pi deyo madit pa Rwot.

6Kadi bed Rwot bedo malo kamabor tutwal,

pud neno jo mamwol ma lucan i cwinygi;

ento jo ma luwake en ngeyogi woko wa ki kamabor.

7Kadi bed awoto ma can oruma woko dyere,

in pud igwoko kwona;

iryeyo cingi me juku akemo pa lukwora,

ci i lara ki cingi ma lacuc.

8Rwot bicobo yub ma mere ducu pira;

Ai Rwot, mar meri ma pe loke bedo nakanaka.

Pe ibwot gin ma itiyo ki cingi woko.